اسلام آباد (ويب ڊيسڪ) سپريم ڪورٽ جاسوسي جي مبينا جوابدار محمد دين جي ضمانت جي درخواست خارج ڪري ڇڏي.
جسٽس محمد علي مظهر ۽ جسٽس عائشا ملڪ تي ٻڌل ٻه رڪني بئنچ جاسوسي جي مبينا جوابدار محمد دين جي ضمانت جي درخواست تي ٻڌڻي ڪئي.
ٻڌڻي دوران عدالت چيو ته جوابدار تي اڪائونٽ ۾ ٻاهرئين ملڪ مان رقم آڻڻ جو الزام آهي، درخواستگذار افغانستان جو شهري آهي.
وڪيل ٻڌايو ته درخواستگذار افغانستان جو شهري هجڻ ثابت ناهي ٿيو، جوابدار پاڪستاني آهي، پاسپورٽ ۽ سڃاڻپ ڪارڊ به گڏ لڳايو آهي.
جسٽس عائشا ملڪ چيو ته جوابدار جو سڃاڻپ ڪارڊ بلاڪ ڪيو ويو آهي، ان تي وڪيل چيو ته ڪيس ۾ شامل ٻين ٻن جوابدارن جون ضمانتون ٽرائل ڪورٽ منظور ڪيون آهن.
جسٽس محمد علي مظهر چيو ته توهان فريش گرائونڊ تي ٽرائل ڪورٽ ۾ ضمانت جي درخواست داخل ڪيو.
پوءِ جوابدار عدالتي آبزرويشنز تي درخواست واپس وٺي ڇڏي ۽ عدالت ضمانت جي درخواست واپس وٺڻ جي بنياد تي خارج ڪري ڇڏي.
جوابدار خلاف گذريل سال جاسوسي جي الزام ۾ سي ٽي ڊي ٿاڻي ۾ ڪيس داخل ڪيو ويو هو.
