ٽوڪيو (ويب ڊيسڪ) جاپان جي مرڪزي بئنڪ 17 سالن ۾ پهريون ڀيرو وياج جي شرح ۾ واڌ ڪري ڇڏي.
پرڏيهي ميڊيا موجب بئنڪ آف جاپان وياج جي شرح ڪاٽو 0.1 سيڪڙو مان وڌائي 0 کان 0.1 سيڪڙو جي وچ ۾ ڪرڻ جو اعلان ڪيو آهي.
اهو اعلان اهڙي وقت ۾ سامهون آيو آهي، جڏهن جاپان ۾ اگهن ۾ واڌ ڏٺي پئي وڃي.
جاپان طرفان وياج جي شرح ۾ واڌ کانپوءِ هاڻ دنيا ۾ اهڙو ڪو به ملڪ ناهي بچيو، جتي وياج جي شرح ڪاٽو ۾ هجي.
وياج جي شرح ڪاٽو هجڻ جو مطلب اهو آهي ته عوام کي بئنڪن ۾ پئسا رکڻ لاءِ بئنڪن کي ادائيگي ڪرڻي هوندي آهي، مختلف ملڪن طرفان اهو ان ڪري ڪيو ويندو آهي ته جيئن عوام گهٽ کان گهٽ پئسو بئنڪن ۾ رکي ۽ وڌ کان وڌ خرچ ڪري.
هلندڙ مهيني جي شروعات ۾ جاپان جي وڏين ڪمپنين پگهارن ۾ 5.28 سيڪڙو واڌ جو اعلان ڪيو هو، جيڪا گذريل 3 ڏهاڪن دوران ٿيندڙ سڀ کان وڏي واڌ آهي.
جاپان ۾ شين جي اگهن ۾ معمولي واڌ سبب 1990 جي ڏهاڪي جي آخر کان پگهارن ۾ ذڪر جوڳي واڌ نه ٿي هئي.
