اسلام آباد (ويب ڊيسڪ) استحڪام پاڪستان پارٽي جي اڳواڻ عون چوڌري، عمران خان طرفان بشريٰ بي بي جو چهرو نه ڏسڻ جي دعويٰ کي صديءَ جو سڀ کان وڏو ڪوڙ قرار ڏئي ڇڏيو.
عمران خان اڊيالا جيل ۾ صحافين سان ڳالهائيندي دعويٰ ڪئي ته مان بشريٰ بي بي جو چهرو نڪاح کانپوءِ ڏٺو.
ان تي ردعمل ڏيندي تحريڪ انصاف جي اڳوڻي اڳواڻ عون چوڌري چيو ته عمران خان جي اها دعويٰ صديءَ جو سڀ کان وڏو ڪوڙ آهي، پاڻ کي قوم جو ليڊر چوندڙ پاڻ ڪوڙ ڳالهائي ته منهنجو فرض آهي سچ سامهون آڻيان، اڳوڻي وزيراعظم جا پول پڌرا ڪيا ته کيس مُنهن لڪائڻ جي جاءِ نه ملندي.
هن چيو ته عمران خان ۽ بشريٰ بي بي نڪاح کان اڳ ڪيترائي ڀيرا مليا ۽ هڪٻئي کي ڏٺو به هو، بشريٰ بي بي قرآن پاڪ تي حلف ڏئي ته هن عمران خان کي نڪاح کان اڳ نه ڏٺو هو، مان پاڻ اڳوڻي وزيراعظم کي ملاقات لاءِ وٺي ويندو هيس.
سندس چوڻ هو ته عمران خان جي سياست ڪوڙ تي ٻڌل آهي، الله جو شڪر آ ته مان کيس ان وقت ئي ڇڏي ڏنو هو، اڳوڻي واسطي جو لحاظ پيو رکان، جيڪڏهن راز کوليان ته عمران خان جو گند دنيا جي سامهون اچي ويندو.
