لاهور (ويب ڊيسڪ) ن ليگ ۽ ايم ڪيو ايم گڏيل چونڊ حڪمت عملي تي اتفاق ڪندي گڏجي چونڊ وڙهڻ جو اعلان ڪري ڇڏيو.
اڳوڻي وزيراعظم شهباز شريف جي دعوت تي خالد مقبول صديقي جي سربراهي ۾ ايم ڪيو ايم وفد رائيونڊ ۾ ن ليگ قائد نواز شريف سان ملاقات ڪئي.
ايم ڪيو ايم وفد ۾ خالد مقبول صديقي، فاروق ستار ۽ مصطفيٰ ڪمال شامل هئا، جڏهن ته ن ليگ طرفان ملاقات ۾ شهباز شريف، مريم نواز، خواجا سعد رفيق ۽ پرويز رشيد به شريڪ ٿيا.
ذريعن موجب هڪ ڪلاڪ کان وڌيڪ جاري رهندڙ ملاقات ۾ عام چونڊن، چونڊ اتحاد ۽ موجوده سياسي صورتحال تي گفتگو ڪئي وئي.
ملاقات کانپوءِ ايم ڪيو ايم ۽ ن ليگ اڳواڻن پريس ڪانفرنس ڪئي، جنهن ۾ سعد رفيق چيو ته 8 فيبروري جون چونڊون رواداري جي ماحول ۾ وڙهڻ وڃي رهيا آهيون.
فاروق ستار چيو ته ملڪ جي سڀني مسئلن جو حل ڪنهن هڪ جماعت وٽ ناهي، قومي معيشت جي ڳالهه هجي يا قومي سياست جي ڪراچي جو ڪردار اهم آهي.
مصطفيٰ ڪمال چيو ته چونڊ اتحاد وزارتن لاءِ نه عوام جي مسئلن جي حل لاءِ ٿيندو، 2013 ۾ ڪراچي جي 20 مان 17 سيٽون ايم ڪيو ايم کٽيون هيون، اسان ان پوزيشن تي واپس وينداسين.
