ڪراچي (ويب ڊيسڪ) سڄي سنڌ جي اسپتالن ۾ منڪي پاڪس ريسپانس يونٽ قائم ڪرڻ جو حڪم جاري ڪندي هنگامي الرٽ جاري ڪيو ويو.
صوبائي صحت کاتي منڪي پاڪس جي امڪاني پکيڙ روڪڻ لاءِ سڀني ضلعن ۾ هنگامي قدمن جو حڪم ڏئي ڇڏيو.
کاتي طرفان سڀني ڊسٽرڪٽ هيلٿ آفيسرن ۽ ميڊيڪل سپرنٽينڊنٽس کي خاص هدايتون جاري ڪيون ويون آهن.
صوبي جي سڀني وڏين اسپتالن ۾ شڪي منڪي پاڪس ڪيسن لاءِ مخصوص ”ريسپانس يونٽ“ ۽ ”سهولت مرڪز“ قائم ڪيا ويندا.
کاتي سڀني طبي ادارن کي 24 ڪلاڪ فعال ”پبلڪ انفارميشن ۽ فيسليٽيشن ڊيسڪ“ قائم ڪرڻ جي هدايت ڪئي آهي، جتي تربيت يافته عملي کي مقرر ڪيو ويندو.
شڪي مريضن جي فوري ۽ محفوظ منتقلي لاءِ ريسڪيو 1122 سان ويجهو رابطو رکڻ جو حڪم ڏنو ويو آهي.
انفارميشن ڊيسڪ ذريعي عوام کي منڪي پاڪس جي علامتن، احتياطي تدبيرن ۽ بچاءَ جي طريقن بابت آگاهي فراهم ڪئي ويندي.
کاتي سڀني اسپتالن، سرويلنس ٽيمن ۽ ايمرجنسي خدمتن وچ ۾ رابطو وڌائڻ ۽ انفيڪشن ڪنٽرول جي قدمن تي سختي سان عمل ڪرائڻ جي هدايت ڪئي آهي.
صحت کاتي سڀني لاڳاپيل ادارن ۽ اسپتالن جي سربراهن کي هدايت ڪئي آهي ته اهي انهن قدمن تي عملدرآمد جي رپورٽ 48 ڪلاڪن اندر جمع ڪرائين ته جيئن صوبائي سطح تي تيارين جو جائزو وٺي سگهجي.
