اسلام آباد (ويب ڊيسڪ) سڄي دنيا ۾ هٿرادو ڏاهپ جي مختلف شعبن ۾ ڀرپور شموليت کانپوءِ هائير ايجوڪيشن ڪميشن اي آءِ کي باقاعدي اعليٰ تعليمي نصاب جو حصو بڻائيندي اهم ترين هدايتون جاري ڪري ڇڏيون.
حڪومتي نگراني هيٺ هلندڙ ۽ پرائيويٽ سيڪٽر بابت يونيورسٽين جي سربراهن جي نالي جاري ڪيل خط ۾ ايڇ اي سي اي آءِ جي نصاب ۾ شموليت لاءِ گائيڊ لائنز جاري ڪيون آهن، جنهن کانپوءِ ايڇ اي سي سڀني ڊگري پروگرامن ۾ هٿرادو ڏاهپ تي لازمي 3 ڪريڊٽ ڪلاڪن جي ڪورس جي شموليت جو نوٽيفڪيشن جاري ڪري ڇڏيو.
هٿرادو ڏاهپ ڪورس سال 2026 جي تعليمي سيشن سان سڀني ڊگري پروگرامن ۾ لازمي طور متعارف ڪرايو ويو آهي، ان حوالي سان ايڇ اي سي طرفان سڄي ملڪ جي سرڪاري ۽ نجي شعبي جي اعليٰ تعليمي ادارن کي هدايتون جاري ڪيون ويون آهن.
ايڇ اي سي طرفان يونيورسٽين کي جاري ڪيل خط موجب هر انڊر گريجويٽ ۽ پوسٽ گريجويٽ ڊگري پروگرام ۾ هٿرادو ڏاهپ تي لازمي 3 ڪريڊٽ آور جو ڪورس شامل هوندو، جنهن کي اختياري مضمون طور يا عالمي شعبن واري ڪورس يا پروگرام ۾ شامل مددگار مضمون طور پڙهايو ويندو.
نصاب ۾ اي آءِ جو انضمام رڳو واڌ نه پر وقت جي ضرورت آهي، 21هين صدي جي تيزي سان تبديل ٿيندڙ منظر نامي ۾ هٿرادو ڏاهپ هڪ انقلابي قوت طور اڀري آهي.
هٿرادو ڏاهپ جي تعليم کي نصاب ۾ شامل ڪري شاگردن کي پنهنجي لاڳاپيل شعبن ۾ انهن ٽولز جي اثرائتي استعمال جي قابل بڻائڻ آهي.
ايڇ اي سي وائس چانسلرز، ريڪٽرز ۽ سڀني سرڪاري ۽ نجي يونيورسٽين جي سربراهن کي ان حوالي سان نوٽيفڪيشن جاري ڪري ڇڏيو آهي.
