اسلام آباد( بيورو رپورٽ) وفاقي آئيني عدالت بنا قاعدن جي ڪجهه وڏي پگهار وارا عهدا منظور ڪري ڇڏيا آهن، جنهن تي هاڻي نظرثاني ٿي رهي آهي. هڪ جج مطابق، ان عهدن کي قانوني لحاظ سان سمجهڻ بنا منظور ڪيو ويو آهي. ايف سي سي آئين جي آرٽيڪل 208 تحت ڪجهه تقرريون ڪري چڪي آهي، جنهن ۾ وفاقي حڪومت جي اسپيشل پروفيشنل پي اسڪيل پالي ڪي ۾ ڪجهه ملازمن کي رکيو ويو آهي. آئيني عدالت نوٽيفڪيشن جاري ڪيو جنهن ۾ 8 وڏن عهدن کي تخليق ڪيو ويو. ان ۾ هڪ بي ايس-22 جو عهدو ۽ 7 بي ايس-21 جا عهدا شامل آهن، ۽ سڀني کي آئيني عدالت ۾ رکيو ويو آهي. جنهن ۾ پگهار 15 لک کان 20 لک روپين تائين آهي، جيڪا تقريبنً هاءِ ڪورٽ جي جج جي پگهار برابر آهي. تجربو رکندڙ وفاقي عملدارن جو چوڻ آهي ته وفاقي آئيني عدالت اڃا تائين آرٽيڪل 208 تحت قاعدا تيار ناهي ڪيا، ۽ انڪري اها صرف سپريم ڪورٽ جي قاعدن تي عمل ڪري سگھي ٿي جيڪي سپريم ڪورٽ جي ملازمن ۽ آفيسرن جي مقرري سان لاڳاپيل آهن.حڪومتي ناڻي مان پگهار وٺڻ وارن لاءِ 4 قسم جا پيڪيج آهن: بي سيڪ پي اسڪيل، پروجيڪٽ پي اسڪيل، مينيجمينٽ پي اسڪيل ۽ ايس پي پي ايس، ايس پي پي ايس خاص طور تي خانگي شعبي جا ماهر سرڪاري ادارن ۾ آڻڻ لاءِ ٺاهي وئي هئي. ايف سي سي جي نوٽيفڪيشن مطابق، هنن عهدن ۾ رجسٽرار (بي ايس-22)، سيڪريٽري ٽو دي چيف جسٽس (بي ايس-21)، ايڊشنل رجسٽرار (بي ايس-21)، ڊپٽي رجسٽرار (بي ايس-20)، اسسٽنٽ رجسٽرار (بي ايس-19) ۽ ٻيا مختلف عهدا شامل آهن. انهن عهدن جا خرچ 2025-26 جي مالي سال ۾ وفاقي آئيني عدالت جي مخصوص بجيٽ مان پورا ٿيندا. هڪ سينئر اهلڪار جو چوڻ آهي ته وفاقي آئيني عدالت جو پيڪيج قانوني سمجهه کان بغير منظور ڪيو ويو آهي ۽ هاڻي ان تي نظرثاني جاري آهي.
