لاهور (ويب ڊيسڪ) سڌ سماءَ واري وفاقي وزير عطاءُالله تارڙ چيو آهي ته پي ٽي آءِ باني جون ڀيڻون ڀارتي چينلن تي وڃي ملڪ کي بدنام ڪري رهيون آهن، کين ٻڏي مرڻ گهرجي.
صحافين سان ڳالهائيندي عطاءُالله تارڙ چيو ته امن امان جي صورتحال خراب ڪري ڪنهن سان ملاقات نٿي ٿي سگهي، پي ٽي آءِ جا سمورا سوشل ميڊيا اڪائونٽ ڀارت ۽ افغانستان مان هلي رهيا آهن، اهي ماڻهو ڀارت ۽ افغانستان مان مهم هلرائي پاڻ ايڪسپوز ٿي رهيا آهن، اهي ملڪ دشمنن سان گڏجي سازشون ڪري رهيا آهن.
هن چيو ته پي ٽي آءِ باني جون ٽئي ڀيڻون 9 مئي تي به ڪور ڪمانڊر هائوس ۾ موجود هيون، شاهديون موجود آهن پر ان ڪري بچيل آهن ته وري عمران خان روئيندو ته منهنجي ڀيڻن کي اندر ڪيو ويو آهي.
سندس چوڻ هو ته پي ٽي آءِ باني جون ڀيڻون ڀارت ۽ افغانستان جي چينلن تي انٽرويوز ڏينديون آهن، پي ٽي آءِ جو ملڪ دشمن عنصرن سان ڳٺ جوڙ وائکو ٿي چڪو آهي.
عطاءُالله تارڙ چيو ته افغانستان مان پاڪستان تي حملا ٿين ٿا ته اهي ماڻهو افغان حڪومت جي ترجمان بڻيل آهن، خيبر پختونخواهه حڪومت دهشتگردي خلاف هڪ مذمتي بيان نه ڏنو، هڪ ملڪ جي سرزمين اسان جي خلاف استعمال ٿي آهي، انهن سان محبت سمجهه کان ٻاهر آهي.
