ڪراچي (رپورٽر )عوامي تحريڪ جي مرڪزي صدر صدر ايڊووڪيٽ وسند ٿري، سنڌياڻي تحريڪ ڪالهه منجهند جو ڪراچي پريس ڪلب ۾ پريس ڪانفرنس ڪندي چيو ته ڪراچي سنڌ جي گادي جو هنڌ آهي، هڪ سوچيل سمجهيل سازش تحت ڪراچي کي پرڏيهين خاص ڪري افغافين، بهارين، بنگالين، هندستانين، برمين ۽ ٻين کي سهولتون ڏيئي رهايو ويو آهي. هاڻي وري برما جي روهينگين کي ڪراچي ۾ آباد ڪرڻ جو فيصلو ڪيو ويو آهي . مقامي سنڌي ماڻهن جي قديمي ڳوٺن کي پيپلز پارٽي سرڪار پڪو ڪرڻ لاءِ تيار نه آهي. ڪراچي ۾ قديمي ڳوٺن جي ڳوٺاڻن کي مالڪاڻا حق ڏنا وڃن،26,27 ترميم واپس وٺي ڪورٽ کي غلامي کان آزاد ڪيو وڃي، سنڌ کي صوبن جي ورهاست جي نالي ۾ ورهائڻ جي سازش ختم ڪئي وڃي، پيڪا ائڪٽ ختم ڪري اظهار جي آزادي بحال ڪئي وڃي، ان موقعي تي سنڌياڻي تحريڪ جي مرڪزي صدر عمره سمون، عوامي تحريڪ جو مرڪزي سينيئر نائب صدر نور احمد ڪاتيار، سنڌي شاگرد تحريڪ جو مرڪزي صدر ايڊووڪيٽ نويد عباس ڪلهوڙو، سنڌي گرلس اسٽوڊنٽ تحريڪ جي مرڪزي آرگنائيزر ايڊووڪيٽ ڪونج لاشاري ۽ ايڊووڪيٽ ڪائنات ڏاهري موجود هئا، هن چيو ته موجوده نواز ليگ ۽ پيپلز پارٽي جي گڏيل حڪومت آئين ۾ تيزيءَ سان تبديليون آڻي، 26هين ۽ 27 هين ترميمن ذريعي اعلى عدالتن کي بي اثر ۽ مفلوج ڪري ڇڏيو آهي اسين سمجهون ٿا ته سنڌ کي ورهائڻ جي اسٽيبلشمينٽ جي پراڻي سازش آهي. خالد مقبول صديقي، فاروق ستار، مصطفى ڪمال ۽ ٻيا ايم ڪيو ايم جا اڳواڻ سنڌ کي ورهائڻ جي مهم هلائي رهيا آهن. شرمناڪ ڳالهه اها آهي ته سنڌ جو گورنر ڪامران ٽسوري اعلان ٿو ڪري ته آئون پهرين ايم ڪيو ايم جو ڪارڪن، آهيان ۽ پوءِ سنڌ جو گورنر آهيان. اسٽيبلشمينٽ دهشتگردن کي چونڊي چونڊي عهدا ڏيئي سنڌ جي سيني مٿان سوار ڪيو آهي. لاهور جي هڪ مخصوص ميڊيا گروپ جي مالڪ ميان عامر محمود کي نوان صوبا ٺاهڻ جي مهم سان لڳايو ويو آهي. ائين جنرل مشرف جي دور ۾ به ڪالاباغ ڊيم جي حمايت ۾ لاهور جي هڪ مخصوص ميڊيا مالڪ کان مهم هلرائي ويئي هئي. اسان سمجهون ٿا هڪ ميڊيا مالڪ يا ميڊيا گروپ طرفان ڌر بڻجي صوبي لاءِ مهم هلائڻ نه ميڊيا جي اصولن ۽ مفادن وٽان آهي ۽ ئي ملڪ جي سالميت ۽ وحدتن جي مفادن وٽان آهي. سٽي ڪورٽ ڪراچي ۾ رسول بخش پليجو شيڊ قائم ڪيو ويو، جنهن جو افتتاح عوامي تحريڪ جي مرڪزي صدر ايڊووڪيٽ وسند ٿري، سنڌياڻي تحريڪ جي مرڪزي صدر عمره سمون، عوامي تحريڪ جي مرڪزي سينيئر نائب صدر نور احمد ڪاتيار، مرڪزي جنرل سيڪريٽري ايڊووڪيٽ ساجد حسين مهيسر، سنڌي گرل اسٽوڊنٽس تحريڪ جي مرڪزي آرگنائيزر ايڊووڪيٽ ڪونج لاشاري، سنڌي شاگرد تحريڪ جي مرڪزي صدر ايڊووڪيٽ نويد عباس ڪلھوڙو ۽ ٻين اڳواڻن ڪيو. ڪراچي بار ايسوسيئيشن جي نائب صدر ايڊووڪيٽ ڪاظم حسين مھيسر، سنڌ بار ڪائونسل جي ميمبر رشيد راڄڙ، حفيظ لاشاري، نعيم قريشي، رحمان ڪورائي جنرل سيڪريٽري ڪراچي بار ايسوسيئيشن، رياض سبزوئي لائبريرين ڪي بي اي، الله وڌايو ناريجو ۽ ٻين وڪيل اڳواڻن شرڪت ڪئي ۽ رسول افتتاحي تقريب کي خطاب پڻ ڪيو ۽ عوامي تحريڪ ۽ سنڌياڻي تحريڪ جي حيدرآباد ريلي تي 500 ڪارڪنن مٿان پيپلز پارٽي سرڪار جي داخل ڪيل ڪيسن جي مذمت ڪئي ۽ 21 ڊسمبر تي لاڙڪاڻي ۾ اعلانيل ريلي ۾ شرڪت جو اعلان ڪيو
