اسلام آباد (بيورو) پي ٽي آءِ باني عمران خان جي ڀيڻ عليما خان چيو آهي ته جيڪي عمران خان تي فاتحه پڙهڻ جي ڳالهه ڪن ٿا انهن کي شرم نٿو اچي؟ ڪنهن چيو ته فاتحه پڙهو! جيڪڏهن عمران خان جي وار کي به تئو آيو ته ڏسجو عوام انهن سان ڇا ٿو ڪري. اسلام آباد هاءِ ڪورٽ ۾ ميڊيا سان ڳالهائيندي عليما خان چيو ته مون کي ننڍڙن ٻارن جي ڪاوڙ ڏسي ڊپ ٿئي ٿو، پاڪستان کي اهڙي طرف نه ڌڪيو جو ماڻهن جي ڪاوڙ ضابطي ۾ نه رهي، جيڪڏهن چور ۽ ڌاڙيل کي مٿي تي رکيو وڃي ته ڏڦيڙ ٿئي ٿو، حڪمران ڏڦيڙ چاهين ٿا، جيڪي چون ٿا ته فاتحه پڙهو انهن کي شرم اچڻ گهرجي. هن چيو ته چيف جسٽس سرفراز ڊوگر جي عدالت رڳو 15 منٽ هلي، پوليس ٽن ميمبرن واري بينچ جي حڪم تي عمل نه پئي ڪري، هي عدالت جي توهين آهي.
