اسلام آباد (بيورو) وزيراعظم شهباز شريف جي سياسي معاملن جي صلاحڪار سينيٽر راڻا ثناءُ الله چيو آهي ته حڪومت کي باني پي ٽي آءِ کان ڪو خوف ناهي، نجي ٽي وي چينل جي پروگرام ۾ ڳالهائيندي هن چيو ته باني پي ٽي آءِ سان ملاقات جي اجازت هئڻ گهرجي، 3 ڪلاڪن جي ملاقات کان پوءِ ڏيڍ ڪلاڪ جي پريس ڪانفرنس نه هئڻ گهرجي، ڀڃ ڊاهه، گهيراءُ ۽ اسلام آباد ڏانهن حملو ڪرڻ جي ڳالهه نه هئڻ گهرجي، هن چيو ته ڪو به قانون اجازت نه ٿو ڏئي ته ڪو جيل ۾ ويٺل ماڻهو ٻاهر نڪري تحريڪ هلائي، ملاقات کان پوءِ ڪلاڪن تائين پريس ڪانفرنس ڪرڻ جي اجازت قانون موجب ناهي، اسان عوام وٽ وينداسين ۽ ٻڌائينداسين ته اسان سڀ رستا اختيار ڪيا پر ملاقات نه ٿي، جڏهن ته باني پي ٽي آءِ 26 نومبر تي احتجاج جو سڏ ڏنو هو، قانون موجب باني پي ٽي آءِ سان ملاقات هئڻ گهرجي ۽ جنهن عدالت کيس ملاقات جي اجازت ڏني، ان ۾ ٻن شين جو خيال رکيو وڃي، ملاقات ڪئي وڃي ۽ سياست نه ڪئي وڃي.
