ڪراچي (عوامي آواز رپورٽ) نيشنل اڪائونٽبلٽي بيورو (نيب) ڪراچي اڳوڻي صحت کاتي جي سيڪريٽري ڊاڪٽر فضل الله پيچوهو خلاف جاچ جو عمل تيز ڪري ڇڏيو آهي. نيب کي صحت کاتي ۾ اربين رپين جي ماليت وارن ٺيڪن ۾ گهوٻين جون شڪايتون مليون آهن، جنهن بعد يونيورسل انٽرپرائيزز ڪمپني جي اختيارين کي جاچ هيٺ آندو ويو آهي. جاچ دوران ڪمپني جي مئنيجنگ ڊائريڪٽر محمد عليم مرزا، مينيجر امپورٽس عبدالشڪور ۽ مئنيجر اڪائونٽس احمد عبدالخالق کي رڪارڊ پيش ڪرڻ لاءِ چيو ويو آهي. نيب تفصيل سان پڇي رهي آهي ته 200 ڊائلاسز مشينن، ڪارڊيڪ سرجري جي سامان ۽ ٻين شين جي خريداري ڪيئن ٿي، مشينون ڪهڙي هنڌ لڳايون ويون، ۽ هر هنڌ لڳل مشينن جو تعداد ڪيترو آهي؟ نيب اختيارين چيو آهي ته شڪايتون مالي گهوٻين سان لاڳاپيل آهن ۽ ڪمپني جو مڪمل رڪارڊ جاچ لاءِ پيش ڪيو وڃي.
