اسلام آباد(عوامي آواز رپورٽ)جماعت اسلامي جي اڳوڻي سينيٽر مشتاق احمد خان چيو آهي ته ورلڊ پريس فريڊم انڊيڪس مطابق، گذريل سال پاڪستان 152هين نمبر تي هو، جڏهن ته 2025ع ۾ پاڪستان 158هين نمبر تي اچي ويو آهي، گلوبل ڊيموڪريسي انڊيڪس ۾ پاڪستان مسلسل هيٺ اترندو پيو وڃي، ۽ 2025ع ۾ 165 ملڪن مان 124هين نمبر تي آهي۔ان انڊيڪس مطابق، پاڪستان جو حڪومتي نظام نيم جمهوري نه پر آمراڻو قرار ڏنو ويو آهي، هن چيو ته قانون جي حڪمراني ۾ گذريل سال پاڪستان 129هين نمبر تي هو، جڏهن ته 2025ع ۾ 130هين نمبر تي اچي ويو آهي،هن چيو ته آءِ ايم ايف جي رپورٽ ۾ عدالتي نظام کي زوال پذير قرار ڏنو ويو آهي، جنهن ۾ چيو ويو آهي ته انصاف فراهم ڪندڙ ادارا ڪافي حد تائين ڪرپٽ آهن رپورٽ ۾ وڌيڪ چيو ويو آهي ته پاڪستان ۾ گورننس تي ڪرپشن جا مستقل بادل آهن، جنهن سبب اقتصادي ترقي، سيڙپڪاري ۽ عوام جو اعتماد متاثر ٿي رهيو آهي،ٻئي پاسي سينئر صحافي حامد مير لکيو آهي ته توهان جيتريون به ضمني چونڊون کٽي وٺو، ۽ جيتريون به آئيني ترميمون منظور ڪرائي وٺو، پر جنهن آءِ ايم ايف توهان کي 7 ارب ڊالر جو قرض ڏئي پاڪستان کي ڊيفالٽ کان بچايو آهي، اها ئي توهان جي گورننس ۽ عدالتي نظام تي ڪرپشن جو الزام لڳائي رهي آهي۔هي الزام سڄي نظام خلاف چارج شيٽ جي حيثيت رکي ٿو.
