اسلام آباد (ويب ڊيسڪ) اسلام آباد هاءِ ڪورٽ دفاعي تجزئي نگارن جي ٽي وي پروگرامن ۾ شرڪت آءِ ايس پي آر جي اجازت سان مشروط ڪرڻ جو پيمرا جو نوٽيفڪيشن معطل ڪري ڇڏيو.
دفاعي تجزئي نگارن جي ٽي وي پروگرامن ۾ شرڪت آءِ ايس پي آر جي اجازت سان مشروط ڪرڻ جي نوٽيفڪيشن خلاف ٻڌڻي ٿي.
نوٽيفڪيشن موجب رڳو آرمڊ فورسز جا رٽائرڊ آفيسر ئي ٽي وي پروگرامن ۾ شرڪت ڪري سگهن ٿا، پيمرا رٽائرڊ آفيسرن جي ٽي وي پروگرامن ۾ شرڪت کي آءِ ايس پي آر جي اجازت سان مشروط ڪيو هو.
اڄ بابر ستار پيمرا جي 2019 جي نوٽيفڪيشن خلاف ڪيس جو لکت حڪم نامو جاري ڪري ڇڏيو، جنهن ۾ چيو ويو آهي ته پيمرا طرفان وڪيل عدالتي ٻڌڻي ۾ پيش نه ٿيو، مددگار وڪيل سينيئر وڪيل جي طبعيت ٺيڪ نه هجڻ تي التويٰ جي اپيل ڪئي، عدالتي ٻڌڻي ۾ ڏنل دليلن جي بنياد تي پيمرا نوٽيفڪيشن معطل ڪيو وڃي ٿو.
اسلام آباد هاءِ ڪورٽ پنهنجي حڪم نامي ۾ وڌيڪ چيو ته پيمرا جو نوٽيفڪيشن ان ڪيس تي فيصلي تائين معطل رهندو.
پوءِ اسلام آباد هاءِ ڪورٽ ڪيس جي ايندڙ ٻڌڻي 11 فيبروري تائين ملتوي ڪري ڇڏي.
