اسلام آباد (ويب ڊيسڪ) حڪومت ۽ تحريڪ انصاف ۾ ڳالهين جو پهريون دور بنا نتيجي ختم ٿي ويو.
وفاقي گهرو وزير محسن نقوي، تحريڪ انصاف چيئرمين بيرسٽر گوهر ۽ ڪي پي حڪومت جي صلاحڪار بيرسٽر سيف وچ ۾ ڳالهيون ٿيون.
ذريعن موجب حڪومت طرفان پي ٽي آءِ اڳواڻن کي اسلام آباد نه اچڻ جي درخواست ڪئي وئي ۽ موقف اختيار ڪيو ويو ته بيلاروس جي سيڙپڪارن سان سڀاڻي اسلام آباد ۾ بزنس ڪانفرنس ٿي رهي آهي.
ذريعن جو چوڻ آهي ته پي ٽي آءِ کي ڌرڻي لاءِ پريڊ گرائونڊ يا پشاور موڙ تي جاءِ ڏيڻ جي آڇ ڪئي وئي، جنهن کي پي ٽي آءِ رد ڪري ڇڏيو.
ذريعن موجب پي ٽي آءِ اڳواڻ باني عمران خان جي آزادي جي مطالبي تي قائم آهن ۽ هنن موقف اختيار ڪيو ته پي ٽي آءِ باني کي آزاد نه ڪيو ويو ته ڊي چوڪ پهچنداسين.
ذريعن جو چوڻ آهي ته محسن نقوي ان حوالي سان وزيراعظم کي آگاهه ڪندو، جڏهن ته ڳالهين جو ٻيو دور ٿيڻ جو به امڪان آهي.
