ڪراچي (ويب ڊيسڪ) سيڪيورٽي خدشن سبب جناح انٽرنيشنل ايئرپورٽ ڪراچي ۽ ان جي لاڳاپيل علائقن کي ريڊ زون قرار ڏنو ويو آهي.
جناح انٽرنيشنل ايئرپورٽ تي ڪنهن به غير قانوني سرگرمي جي روڪٿام ۽ شڪي ماڻهن جي داخلا روڪڻ لاءِ پوليس جون واڌو چيڪ پوسٽون به قائم ڪيون ويون آهن.
ملير پوليس جي ترجمان موجب ايئرپورٽ تان اندروني ملڪ ۽ ٻاهرئين ملڪ روانو ٿيندڙ مسافر چيڪ پوسٽن تان مڪمل ڪليئرنس کانپوءِ ئي ايئرپورٽ جي حدن ۾ داخل ٿي سگهندا، چيڪ پوسٽون اسٽار گيٽ، سي اي اي ڪلب روڊ، مادام بريج، ماڊل موڙ ۽ اي ايس ايف روڊ چوڪي تي قائم ڪيون ويون آهن.
واڌو چيڪ پوسٽن تي پوليس ۽ رينجرز جا اهلڪار گڏيل طور چيڪنگ ڪندا، حفاظتي قدم ڪنهن به امڪاني خطري جي روڪٿام، شهرين ۽ مسافرن جي جان ۽ مال جي حفاظت لاءِ کنيا پيا وڃن.
سيڪيورٽي ادارن طرفان مسافرن ۽ انهن سان گڏ ايندڙ شهرين کي درخواست ڪئي وئي آهي ته اهي پنهنجا سڃاڻپ ڪارڊ ۽ ٽڪيٽ گڏ رکن، ريڊ زون ۾ غير ضروري داخلا تي پابندي هنئي وئي آهي، ڪنهن به پريشاني کان بچڻ لاءِ شهرين کي اچ وڃ جا ٻيا رستا اختيار ڪرڻ جي هدايت ڪئي وئي آهي.
