اسلام آباد(طلعت حسين)اسلام آباد جي سياسي ماحول ۾ هن وقت غيريقيني ۽ دٻاءُ جي ڪيفيت لڳاتار گهري ٿيندي پئي وڃي، اهڙي صورتحال ۾ صدر آصف علي زرداري ۽ وفاقي گهرو وزير محسن نقوي جي تازي ملاقات ان تاثر کي وڌيڪ هٿي ڏني آهي ته پردي پٺيان ڪا اهم اڳڀرائي غور هيٺ آهي. پاڪستان جي سياست ۾ اها هڪ مڃيل حقيقت آهي ته جڏهن اقتدار جي اهم مرڪزن وچ ۾ رابطا وڌن ٿا ته اهي رڳو رسمي معاملن تائين محدود نه هوندا آهن، پر انهن جو واسطو ڪنهن وڏي فيصلي يا بحران کي سنڀالڻ سان هوندو آهي.
محسن نقوي هن سياسي منظرنامي ۾ رڳو گهرو وزير نه، پر اهڙي اهم ڪردار طور سامهون اچي رهيو آهي، جيڪو ايوان صدر ۽ عسڪري قيادت جي وچ ۾ هڪ اثرائتي رابطي واري پل سمجهيو وڃي ٿو. تازين سرگرمين ۽ حساس معاملن ۾ سندس شموليت، خاص طور ايران جهڙن اهم سفارتي دورن دوران ”پوائنٽ پرسن“ طور موجودگي، ان ڳالهه ڏانهن اشارو ڪري ٿي ته هو رياستي فيصلن جي مرڪز ۾ موجود آهن.
ٻئي پاسي آصف علي زرداري پنهنجي سياسي بصيرت، مفاهمتي حڪمت عملي ۽ ڏکين حالتن کي پنهنجي حق ۾ موڙڻ جي صلاحيت سبب هڪ تجربيڪار سياسي رانديگر طور سڃاتو وڃي ٿو، جيڪو طاقت جي توازن کي چڱي ريت سمجهي ٿو. تنهن ڪري ٻنهي شخصيتن جي هن ملاقات کي رڳو رسمي نه، پر هڪ حڪمتِ عملي واري صلاح مشوري طور ڏٺو پيو وڃي.
هي ملاقات اهڙي وقت ٿي آهي، جڏهن ملڪ گڏيل طور غيريقيني صورتحال، امن امان جي خراب ٿيندڙ حالت، بلوچستان ۽ خيبرپختونخوا ۾ جاري دهشتگردي، گڏوگڏ معاشي ۽ انتظامي بيچيني سبب سخت دٻاءُ هيٺ آهي. گڏيل نظام اهڙي ”ڦوڪڻي“ جهڙي صورتحال ۾ نظر پيو اچي جيڪو ڪنهن به مهل ڦاٽي سگهي ٿو. ظاهري طور وزيراعظم شهباز شريف جا اسٽيبلشمينٽ سان لاڳاپا وفاقي حڪومت کي مضبوط ظاهر ڪن ٿا، پر مرڪز کان ٻاهر نظام سخت دٻاءُ هيٺ آهي، جتي ڪڻڪ جي بحران جهڙين انتظامي خامين کان وٺي آزاد ڪشمير جي بيچيني ۽ تحريڪ انصاف جي احتجاجن تائين عوامي ناراضگي لڳاتار وڌندي پئي وڃي.
اهو به غيرمعمولي آهي ته ملڪ جي لڳ ڀڳ سڀني علائقن ۾ اثرائتي مخالف ڌر جي کوٽ آهي، جيڪا عام طور نظام مان دٻاءُ گهٽائڻ جو ذريعو هوندي آهي. تنهن هوندي به نظام اندر ڇڪتاڻ برقرار رهڻ ان ڳالهه جي نشاندهي ڪري ٿي ته مسئلن جون پاڙون گهڻيون وڌيڪ گهريون آهن. ساڳئي وقت پنجاب ۾ به خاموش سياسي ڇڪتاڻ جاري آهي، جتي حڪومتي ڪارڪردگي کي چئلينج ڪرڻ لاءِ متبادل سياسي بيانيي کي ترتيب ڏنو پيو وڃي ۽ مريم نواز جي قيادت کي انگن اکرن ۽ ترقياتي منصوبن جي مقابلي ذريعي دٻاءُ ۾ آڻڻ جي ڪوشش ٿي رهي آهي، جنهن کي طاقت جي اندرين مرڪزن ۾ جاري رساڪشي جو عڪس قرار ڏنو پيو وڃي.
اهڙي صورتحال ۾، جڏهن نظام تي دٻاءُ ناقابل برداشت بڻجي وڃي ۽ هر پاسي بيچيني پکڙيل هجي، تڏهن پاليسي جوڙيندڙ اڪثر حالتن کي سنڀالڻ لاءِ ڪنهن نه ڪنهن سياسي قرباني جو سهارو وٺندا آهن. تنهن ڪري ”ٽرابل شوٽر“ طور سڃاتل محسن نقوي ۽ سياسي حڪمتِ عملي جو ماهر آصف علي زرداري جو اهڙي نازڪ مرحلي تي گڏ ويهي صلاح مشورو ڪرڻ ان ڳالهه ڏانهن اشارو سمجهيو پيو وڃي ته پردي پٺيان ڪا اهم اڳڀرائي هلي رهي آهي ۽ ايندڙ ڏينهن ۾ نظام کي بچائڻ لاءِ ڪنهن اهم سياسي شخصيت يا هاڻوڪي سياسي سيٽ اپ بابت وڏو فيصلو سامهون اچي سگهي ٿو.
