لاهور(عوامي آواز نيوز)سوشل ميڊيا تي ٽرينڊ هلي رهيو آهي ته پنجاب حڪومت هڪ 2019 واري گلف اسٽريم GVII-G500 جهاز حاصل ڪئي آهي، جنهن جي قيمت تقريباً 38 کان 42 ملين آمريڪي ڊالر آهي، ته جيئن سرڪاري سفر لاءِ وفاقي يا فضائي فوج جي جهازن تي ڀاڙڻ جي ضرورت نه رهي. هي جهاز 14 کان 19 مسافرن کي ويهاري سگهي ٿو ۽ 5,300 ناٽيڪل ميل تائين اُڏي سگهي ٿو.اهڙي وقت تي هي فيصلو، جڏهن معيشت آءِ ايم ايف تي ڀاڙيندڙ آهي ۽ بيروزگاري ۽ مالي دٻاءُ وڌندڙ آهن، عوامي ترجيحن تي بحث کي جنم ڏنو آهي،اڳوڻي گورنر محمد زبير ٽوئيٽ ڪيو ته اهو هڪ تمام خوبصورت جهاز آهي، جنهن جي قيمت 1000 ڪروڙ کان وڌيڪ آهي، جيڪو پنجاب حڪومت پنهنجي وزيراعليٰ ۽ پارٽي جي اهم اڳواڻن لاءِ خريد ڪيو آهي.ڇا اها قوم، جيڪا معاشي جدوجهد ڪري رهي آهي، جنهن ۾ 45 سيڪڙو ماڻهو غربت جي لڪير هيٺ آهن ۽ بيروزگاري جو رڪارڊ ٽٽيو آهي، اها عياشي برداشت ڪري سگهي ٿي؟جيڪڏهن هي صحيح نه آهي ته پنجاب حڪومت شايد ترديد جاري ڪري.محمد جلال اسحاق لکيو ته جڏهن پنجاب حڪومت وٽ اڳ ۾ ئي هاوڪر 400 جهاز موجود آهي، ته پنجاب جي وزيراعليٰ کي اهڙو جهاز ڇو گهرجي پاڪستان هڪ اهڙو ملڪ آهي جيڪو آءِ ايم ايف جي مالي مدد تي گذاري ٿو ۽ هر شئي تي غريب کان ٽيڪس وٺي ٿو،حسن بخاري لکيو ته پنجاب ۽ پاڪستان لاءِ ڪهڙو بهتر ڏينهن آهي!
تعليم، صحت، انساني حق، قانون جي حڪمراني جهڙين ڳالهين سان ڪنهن کي ڪهڙو فرق پوي ٿو جڏهن وي آءِ پي شخصيتون عوامي پئسن تي اهڙن شاندار جهازن ۾ سفر ڪري سگهن ٿيون،اڳوڻي وفاقي وزير فواد چوڌري لکيو ته پنجاب حڪومت وٽ سٺي جهاز هجڻ ڪو مسئلو نه آهي، صرف مسئلو اهو آهي ته پنجاب ۾ چونڊيل حڪومت هجي، نه ڪي اهڙي حڪومت جيڪا فارم 47 ذريعي لاڳو ڪئي وئي هجي.
-
عوام قربانيون پيو ڏئي،حڪمران عياشيون پيا ڪن:مفتاح اسماعيل
ڪراچي(عوامي آواز نيوز)ناڻي واري اڳوڻي وزير مفتاح اسماعيل چيو آهي ته اڍائي سالن کان هي حڪومت چئي رهي آهي ته اسان ڊيفالٽ ڏانهن نه پيا وڃون،اها ڳالهه ٺيڪ آهي،ملڪ ۾ استحڪام اچي چڪو آهي،اهو استحڪام غريب ماڻهن جون نوڪريون کسي آندو ويو آهي ته ان استحڪام جو ڪهڙو فائدو؟استحڪام پيٽرول،بجلي جا اگهه وڌائي،ٽيڪس لڳائي،بيروزگاري ۽ غربت وڌائي آندو ويو آهي ته پوءِ اسان کي سوچڻو پوندو ته اسان بنيادي سڌارا ڪرڻا هئا اهي ته ڪريون،هن چيو ته ڪالهه تيل اگهه وڌا ويا آهن پر ڪالهه هڪ ٻي خبر به آئي آهي ته پنجاب حڪومت 1170 ارب رپين جو هڪ جهاز خريد ڪيو آهي ٻئي پاسي ماڻهن کان ٻارن جو کير ۽ ڪاپيون خريدڻ تي 18 سيڪڙو ٽيڪس وٺندا ته اهو تمام وڏو تضاد آهي،عوام کان قربانيون وٺي رهيا آهيو ۽ حڪمران عياشيون ڪري رهيا آهن
