لاهور (ويب ڊيسڪ) پاڪستاني ڄائي برطانوي باڪسر عامر خان چيو آهي ته باڪسنگ ۾ پاڪستان جو مستقبل روشن آهي ۽ هڪ ڏينهن پاڪستان مان به محمد علي ۽ مائڪ ٽائسن جهڙو چيمپيئن ايندو.
لاهور جناح اسپورٽس ڪمپليڪس ۾ ٿيل انٽرنيشنل باڪسنگ چيمپيئن شپ ۾ برطانوي باڪسر جيمز ميٽڪالف ڊبليو بي اي ايشيا گولڊ ميڊل ويٽ ٽائٽل حاصل ڪيو.
جيمز ميٽڪالف ڊومينيڪن ريپبلڪ جي جوليو ڊي جيسس کي ٽئين رائونڊ ۾ ناڪ آئوٽ ڪيو.
ارجنٽينا جي باڪسر البرٽو پلميٽا ڊبليو بي اي ايشيا سائوٿ ويلٽر ويٽ جو ٽائٽل ماڻيو، البرٽو پلميٽا فلپائني باڪسر جوفر مينٽانو کي ڇهين رائونڊ ۾ ناڪ آئوٽ ڪيو.
ان موقعي تي ميڊيا سان ڳالهائيندي اڳوڻو برطانوي باڪسر عامر خان چيو ته لاهور اچي خوشي ٿي، ٽورنامينٽ 15 ملڪن جي باڪسرن حصو ورتو.
عامر خان چيو ته چيمپيئن شپ ذريعي پاڪستان ۾ راندين کي هٿي ملندي، ميزباني شاندار هئي، مداحن ڀرپور سپورٽ ڪيو، ايونٽ پاڪستان جي سياحت ۾ مددگار ثابت ٿيندو.
اڳوڻي ورلڊ چيمپيئن چيو ته پاڪستان ۾ نهايت ٽيلينٽيڊ باڪسرز موجود آهن، باڪسنگ ۾ پاڪستان جو مستقبل روشن آهي ۽ هڪ ڏينهن پاڪستان مان به محمد علي ۽ مائڪ ٽائسن جهڙو چيمپيئن ايندو.
عامر خان چيو ته هتي جيڪي مقابلا ڏنا اُهي شاندار هئا ۽ ههڙو شاندار ايونٽ آرگنائيز ڪرڻ تي پاڪ فوج جو به تمام گهڻو ٿورائتو آهيان، پاڪ آرمي سمورن پرڏيهي باڪسرن ۽ مهمانن کي بهترين سيڪيورٽي فراهم ڪئي.
