واشنگٽن (ويب ڊيسڪ) آمريڪي رياست ڪيليفورنيا ۾ آيل زلزلي دوران هڪ چڙيا گهر ۾ هاٿين پنهنجي تحفظ لاءِ حيرت انگيز قدم کنيو.
پرڏيهي ميڊيا موجب آمريڪي رياست ڪيليفورنيا جي علائقي سان ڊياگو ڪائونٽي ۾ ٻه ڏينهن اڳ 5.2 شدت جو زلزلو آيو هو، ان زلزلي سبب جتي ماڻهن ۾ خوف هراس پکڙجي ويو، اتي ئي زلزلي دوران چريا گهر ۾ هاٿين جي عجيب حرڪت سڀني کي دنگ ڪري ڇڏيو.
سان ڊياگو جي هڪ چڙيا گهر مان هاٿين جي ٽولي جي هڪ وڊيو شيئر ڪئي وئي، جنهن ۾ زلزلي اچڻ دوران جانورن جو انوکو رويو ڏٺو ويو.
وڊيو ۾ ڏسي سگهجي ٿو ته زلزلي سبب جيئن ئي زمين لڏي ٿي ته ان وقت چڙيا گهر ۾ موجود آفريقي هاٿي هڪ دائرو ٺاهي بيهي ٿا رهن.
هاٿين جو اهو ٽولو تقريبن 4 منٽن تائين دائرو ٺاهي بيهي رهيو ۽ زلزلي جا لوڏا ختم ٿيڻ کانپوءِ معمولي سرگرميون شروع ڪيون.
چڙيا گهر جي ترجمان ايملي سيننگر موجب ان رويي کي ”الرٽ سرڪل“ جو نالو ڏنو ويندو آهي ۽ ان جو مقصد ننڍن هاٿين سميت سموري ٽولي کي خطرن کان بچائڻ هوندو آهي.
ترجمان وڌيڪ ٻڌايو ته هاٿي پنهنجي پيرن سان زلزلي جو آواز محسوس ڪري سگهن ٿا.
