اسلام آباد (ويب ڊيسڪ) سياسي معاملن بابت وزيراعظم جي صلاحڪار راڻا ثناءُ الله چيو آهي ته فيض حميد کي تحويل ۾ وٺڻ ۽ ڪورٽ مارشل جو قدم پاڪ فوج جو احترام ۽ عزت وڌائيندو.
نجي ٽي وي چئنل سان گفتگو ۾ راڻا ثناءُ الله چيو ته فيض حميد خلاف ڪجهه شيون ثابت ٿي چڪيون هونديون، تنهن ڪري کيس فوجي تحويل ۾ ورتو ويو.
هن چيو ته ڪورٽ مارشل جي عمل کي فوجي طريقي ڪار موجب اڳتي وڌڻو آهي، فيض آباد ڌرڻي جي معاهدي ۾ فيض حميد جون صحيحون آهن، يقينن انڪوائري جي عمل ۾ اهي شيون شامل هونديون، فيض آباد ڌرڻي ۾ ماڻهن کي مينيج ڪري ويهاريو ويو هو.
سندس چوڻ هو ته فيض آباد ڌرڻي ۾ ماڻهن کي کڻڻ ۾ فيض حميد جو ڪردار هو، سپريم ڪورٽ جو هائوسنگ سوسائٽي بابت حڪم هو، هائوسنگ سوسائٽي جي حوالي سان انڪوائري ٿي، اسان کي ان معاملي ۾ ان ئي حد تائين محدود رهڻ گهرجي.
راڻا ثناءُ الله چيو ته ڪيتريون ئي بي ضابطگيون هائوسنگ سوسائٽي جي حوالي سان ئي سامهون آيون هونديون، ٻين معاملن ۾ انڪوائري ٿي آهي ته شيون سامهون اچي وينديون، اسان کي آءِ ايس پي آر جي بيان تائين محدود رهڻ گهرجي.
