ڪراچي (ويب ڊيسڪ) وڏي وزير مراد علي شاهه واضح ڪيو آهي ته آئين تحت هر شهري کي احتجاج، جلسي، جلوس ۽ اظهار جي آزادي جو مڪمل حق حاصل آهي پر ان جي آڙ ۾ ڪنهن کي به روڊ بند ڪرڻ ۽ عوام کي تڪليف ۾ وجهڻ جي اجازت نه ڏينداسين.
ڪراچي ۾ صحافين سان ڳالهائيندي مراد علي شاهه چيو ته احتجاج جمهوري حق آهي ۽ صوبائي حڪومت ان حق جو احترام ڪري ٿي پر احتجاج ائين ٿيڻ گهرجي، جنهن سان عام شهري جي زندگي متاثر نه ٿئي، عوام کي تڪليف ۾ وجهڻ نه رڳو غير ذميواراڻو رويو پر قانون جي ڀڃڪڙي آهي، احتجاج لاءِ مخصوص ۽ متبادل هنڌ موجود آهن، مرڪزي روڊ بند ڪرڻ ڪنهن صورت ۾ قبول نه ڪيو ويندو.
هن چيو ته حڪومت شهر ۾ احتجاج ۽ جلسن لاءِ ڪيترائي هنڌ مختص ڪيا آهن، جتي ماڻهو بنا ڪنهن رنڊڪ جي پنهنجو آواز اٿاري سگهن ٿا پر مرڪزي روڊن تي احتجاج ۽ عوام کي تڪليف ۾ وجهڻ جي اجازت نه ڏني ويندي.
مراد علي شاهه وڌيڪ چيو ته اسان ڪشميري ڀائرن سان گڏ آهيون، اسان جي جدوجهد ڪشمير جي آزادي تائين جاري رهندي.
