سياري جي موسم جي شروعات سان ئي سڀ کان پهريان گرم ڪپڙن جو خيال ذهن ۾ اچي ٿو، جنهن لاءِ مڪمل تياري ڪئي ويندي آهي، پر ٻين سڀني ڪمن ۾ رڌجي وڃڻ جي ڪري هر ماڻهو پنهنجي خوراڪ جو خيال رکڻ وساري ويهي ٿو.
ٿڌ جي موسم ۾ نزلي، زڪام، کنگھه ۽ هڏن جي سور جهڙيون بيماريون عام ٿين ٿيون، جن سان مقابلو ڪرڻ لاءِ جسم جي مدافعتي نظام جو مضبوط هجڻ ضروري آهي.
اڄ اسان توهان کي ڪجهه اهڙين خوراڪن بابت ٻڌائينداسين، جن جي استعمال سان توهان پنهنجو مدافعتي نظام مضبوط ڪري سگهو ٿا. انهن کاڌن جي ڪري توهان کي سياري جي موسم ۾ بهترين جسماني طاقت ملندي.
انڊا
ماهرن جو چوڻ آهي ته انڊا صحت مند چرٻي سان ڀرپور هوندا آهن ۽ اهي جسم جي ٽشوز جي بحالي ۾ مددگار ٿين ٿا. بالغ ماڻهو عام طور تي روزانو 2 انڊا کائي ته ان جي جسماني توڙي دماغي صلاحيت بهتر ٿيندي ۽ وڌندي آهي. انڊا مڪمل خوراڪ آهن، جيڪي پروٽين سان ڀرپور آهن، انهن جي استعمال سان توهان جو پيٽ ڀريل محسوس ٿيندو آهي ۽ واڌو ڪيلوريز کي گھٽائڻ ۾ به مدد ملندي آهي.
ديسي گيهه
ديسي گيهه کي صحت لاءِ فائدي مند سمجھيو ويندو آهي ۽ سياري ۾ ان جو استعمال توهان جي جسم کي گرمائش فراهم ڪري ٿو. ان کانسواءِ ديسي گيهه توهان جي جسم کي نقصان نه ٿو ڏئي ۽ اهو سولائيءَ سان هضم ٿي ويندو آهي، ديسي گيهه جي استعمال سان هڏا مضبوط ٿيندا آهن ۽ جسماني طاقت ملندي آهي.
ڪتل ۽ ڳُڙ
هڏن جي مرض ۾ مبتلا ماڻهو، جسماني ڪمزوري جي ڪري پريشان توڙي دماغي طاقت وڌائڻ جا شوقين ماڻهو جيڪڏهن ڪتل نٿا استعمال ڪن ته انهن جا مسئلا حَل ٿيڻ ڏکيا آهن. اهڙي مقصدن لاءِ ڪتل جو استعمال بهترين آهي، ڇو ته ڪتل وٽامنز، منرلز ۽ فائبر جو خزانو آهي. ان سان گڏ قدرتي مٺاڻ ڳڙُ به سياري جي موسم ۾ تمام بهترين ثابت ٿيندو، جيڪو. ڳڙُ ڦڦڙن کي صاف ڪرڻ ۾ مدد ڪري ٿو ۽ ٿڌ کان محفوظ رکي ٿو. ڳڙ ۽ ڪتل جي استعمال سان بي انتها جسماني طاقت ماڻي سگهجي.
آنوُرا
آنوُرَن کي ميوي ۽ سياري جي سوغات ۾ شمار ڪيو ويندو آهي، جنهن ۾ وٽامن سي ججهو مقدار موجود هجي ٿو، جيڪا مدافعتي نظام کي مضبوط بڻائي انفيڪشن سان وڙهڻ ۾ مددگار هوندي آهي، آنوُرن جو استعمال به جسماني ۽ ذهني طاقت وڌائڻ لاءِ بهترين ثابت ٿيندو آهي.
خشڪ ميوا
جيڪڏهن توهان پنهنجي مدافعتي نظام کي مضبوط بڻائڻ چاهيو ٿا، ته خشڪ ميوا استعمال ڪرڻ بهترين آهي. اهي نه رڳو ذائقيدار هوندا آهن، پر جسم کي طاقت، ضروري پروٽين ۽ فائبر مهيا ڪن ٿا. هر خشڪ ميوي جا پنهنجا ۽ الڳ الڳ فائدا آهن پر جيڪڏهن روز جي بنياد تي ٿوري ٿوري مقدار ۾ به خشڪ ميون جو استعمال ڪجي ته نظر جي ڪمزوري، جسماني ۽ دماغي مسئلن توڙي مرداڻي ڪمزوري مسئلن کان بچي سگهجي ٿو.
