بلوچستان ۾ تباهي ۽ حڪومتي ترجمان جي فُل ميڪ اپ سان پريس ڪانفرنس، عوام تَپي باهه

 

اسلام آباد (ويب ڊيسڪ) بلوچستان حڪومت جي ترجمان فرح عظيم شاهه جي گهري ميڪ اپ سان ڪيل پريس ڪانفرنس تي سخت تنقيد ڪئي پئي وڃي.

بلوچستان ۾ طوفاني برساتن کانپوءِ ٻوڏ جي صورتحال آهي ۽ وڏي پئماني تي جاني ۽ مالي نقصان ٿي رهيو آهي.

ٻوڏ جي وهڪرن ۾ وَهي 110 کان وڌيڪ ماڻهو فوت ٿي چڪا آهن، هر پاسي تباهي ئي تباهي آهي ۽ افسوسناڪ واقعا پيش اچي رهيا آهن.

اهڙي صورتحال ۾ هڪ پاسي حڪومت جون امدادي سرگرميون مطمئن ڪندڙ ناهن، جنهن تي عوام اڳ ئي ڪاوڙيل آهي، ويتر وري بلوچستان حڪومت جي ترجمان پنهنجي صوبي جي صورتحال تي اسلام آباد ۾ پريس ڪانفرنس ڪئي ته ماڻهو ڪوئيٽا بدران سندس اسلام آباد ۾ موجودگي تي مڇرجي پيا.

رڳو اهو ئي نه پر فرح عظيم شاهه پريس ڪانفرنس لاءِ جيئن ٺهي سنبري آئي، ان تي به سوشل ميڊيا واهپيدار تپي باهه ٿي ويا آهن.

سوشل ميڊيا واهپيدارن بلوچستان حڪومت جي ترجمان تي تنقيد ڪندي چيو آهي ته فرح عظيم شاهه جون تياريون ڏسي اندازو لڳائي سگهجي ٿو ته کيس ٻوڏ متاثرن جو ڪيترو ڏُک آهي.

هڪ واهپيدار لکيو ته بلوچستان جي ماڻهن جي بي وسي ڏسو ۽ ترجمان کي ڏسو، لڳي ٿو ڪنهن بيوٽي ڪانٽيسٽ ۾ حصو وٺڻ آئي آهي، اسلام آباد ۾ ويهي فيشن ڪرڻ بدران بلوچستان ۾ وڃي ٻڏي مرو، اتي ايترو پاڻي آهي جو توهان جهڙا به ٻڏي سگهن ٿا.

 

You might also like

Leave A Reply

Your email address will not be published.