ڇا اوهان هڪ نوڪري هڪ گهر ۾ ڏني آهي؟

تهرير: نذير سومرو

ڇا اوهان هڪ گهر هڪ نوڪري ڏني آهي، نه! ته پوءِ  بجيٽ ۾ پنج ڏهه سيڪڙو پگهار وڌائي فاتحانه انداز سان ڊائيس تان لهڻ اوهان کي نه جڳائي. اوهان ائين ڇو سمجهي ويٺا آهيو ته سو سيڪڙو مهانگائي وڌائي ڏهه پندرنهن سيڪڙو پگهار وڌائي اوهان قوم کي فتح ڪري چڪا. جيڪڏهن اوهان سمجهو ٿا ته معصوم عوام جا ذهن جيڪي اوهان مسئلن ۾ ايترو منجهائي ڇڏيا آهن اهي ڪڏهن به اوهان جي استادين/هٿ جي صفائين، چالاڪين کي نه سمجهي سگهندا ته اها اوهان جي ڀل آهي. اوهان ملڪ ۾ رهندڙ ٻاويهه ڪروڙ عوام کي نوڪريءَ وارو ڇو ٿا سمجهو. اوهان ته وزارت کان وٺي آفيسري تائين ڪلارڪ کان پٽيوالي/صفائي ڪندڙ مزور تائين جون نوڪريون پاڻ وٽ رکيون آهن. اوهان جا پٽ، ڀائٽيا ڀاڻيجا (ڇوڪرا ۽ ڇوڪريون) ئي رکرايل آهن هر سيٽ تي. اوهان جي شفقت هيٺ هلندڙ ڪيترن ئي گهرن ۾ نوڪريون ئي نوڪريون آهن ۽ وري ڪيترا ئي لکين گهر اهڙا آهن جن ۾ هڪ به نوڪري ڪونهي. اڪثريت نه وارن جي آهي ته پوءِ  اوهان جون وڌايل پگهارون ته رڳو ڪجهه گهرن جي چلهن کي گرم ڪنديون گهڻا چلها ته اوهان وسائي ڇڏيا. اوهان هڪ نوڪري هڪ گهر ڏيو ته ڪا ڳالهه ٺهي. پوءِ  پگهار وڌائي فخر سان چئي سگهو ٿا ته ”اسان ڪو ڪم ڪيو“ يا وري بيروزگاري الائونس ڏيو گهٽ ۾ گهٽ هر گهر ۾ هڪ کي ته ڏيو. اوهان اها ڳالهه ڀلي ڀت ڄاڻندڙ آهيو ته هڪڙن جي پگهار ٻين جا خالي هٿ ”مارڪيٽ“ کي تباهه ڪندڙ هوندا آهن افراط زر جو اصل سبب پيسي جو ٿورن هٿن ۾ اچي وڃڻ هوندو آهي يعني پيسي جي ورڇ ۾ توازن قائم نه رهندو آهي ته مارڪيٽ ۾ شيون هڪڙن لاءِ  سستيون ۽ ٻين لاءِ  ناقابل خريد بڻجي پونديون آهن جنهن کي اوهان جي اهڙن عملن سان هٿي ملندي آهي.

 تازو ملڪ ۾ وفاقي ۽ صوبائي بجيٽون پيش ڪيون ويون. بجيٽ اصل ۾ انگن اکرن جي اهڙي راند هوندي آهي جنهن کي چڱو ڀلو پڙهيل لکيل ماڻهو به سمجهي ڪونه سگهندو آهي. عام ماڻهوءَ کي خبر تڏهن پوندي آهي جڏهن هو دڪانن تي پهچي سامان خريد ڪندي، ان وقت حيران پريشان ٿيندو آهي جڏهن هن کي هوشربا قيمتون ٻڌايون وينديون آهن. بجيٽ کي سوليءَ سنڌيءَ ۾” ڦرلٽ کي قانوني حيثيت ڏيڻ“ چئجي ته غلط نه ٿيندو (اسان جي ملڪ ۾) ڇو ته بجيٽ جو وڏي ۾ وڏو فائدو حڪمران ٽولي ۽ ان جي ساٿي ٽولن (جيڪي اصل ۾ ”مافيائون“ هونديون آهن) کي پوندڙ هوندو آهي ۽ وڏي ۾ وڏو نقصان غريب کان غريب عوام کي. ائين کڻي سمجهو ته بجيٽ هڪ پرنالو (نيسارو، جنهن ذريعي مينهن جو پاڻي ڇت تان هيٺ ڪرندو آهي) آهي جنهن ذريعي سمورو پيسو غريبن جي کيسن کي خالي ڪندي اميرن جي کيسن کي ڀريندو آهي.

اڳي ائين ٿيندو هو ته بجيٽ ۾ ئي هر شيءِ جون قيمتون وڌايون وينديون هيون يعني سال ۾ هڪ دفعو پر هاڻي ائين ناهي. بجيٽ اهڙي پيش ڪندا جو اواهان اسان سمجهنداسين ته ”خير“ ٿي چڪو جيڪو اصل ۾ ”خير“ نه پر ”شِرُ“ هوندو آهي. ملڪ کي اهڙي نهج تي پهچايو ويو آهي جو ان کي ٿوري ٿوري دير کان پوءِ  آڪسيجن ڏيئي هلائڻ جي ضرورت پوي ٿي. ملڪ جا ڦڦڙ ساه کڻي سگهندڙ ڪونه آهن تنهنڪري کي هٿراڌو طور ساهه کڻايو وڃي ٿو. بلڪل ڦڦڙن لاءِ  آڪسيجن وانگر ملڪ کي هلائڻ لاءِ  ٿوري ٿوري وقت کان پوءِ  اگهه وڌائي ملڪ کي هلڻ جهڙو بڻايو وڃي ٿو. اهو ئي سبب آهي جو بجيٽ کي اڃان ڪجهه ڏينهن ئي مس گذريا آهن ته روزانو جي بنياد تي نوان نوان ٽيڪس لڳائي قيمتون وڌايون وڃن ٿيون.

ڊراما بند ڪريو!

ڪالهه سينيٽ ۾ تيل جي قيمتن وڌائڻ خلاف هنگامو ٿيو، اپوزيشن بائيڪاٽ ڪيو. اصل ۾ هي ڊرامو آهي، عوام سان مزاق آهي. اپوزيشن جڏهن حڪومت ۾ هئي ته مهانگائي آسمان سان ڳالهيون ڪندڙ هئي ان وقت انهن بائيڪاٽ ڪونه ڪيو. ان وقت وري اهي بائيڪاٽ ڪندا هئا جيڪي هن وقت ڪرسيءَ تي ”ويهاريل“ آهن يعني مان ڪرسيءَ تي ته هر شي صحيح تون ڪرسيءَ تي ته هر ڳالهه غلط. ”هي منهن ڏيئي ٻن تون وهُه کائي نه مرين“ منافقيءَ ۽ انسان دشمنيءَ جا رڪارڊ قائم ڪندڙ ته سڀ ئي آهن. هر پارٽيءَ جا منافق اقتدار ۾ اچڻ وقت پوئين حڪومت تي تنقيد ڪندا آهن مهانگائي ڪندي اهو ٻڌائيندا آهن، ته هي سڀ پوئين حڪومت جي ڪري ٿيو آهي جيڪڏهن ايئن آهي ته پوءِ  ان کي گرفتار ڇو ڪونه ٿا ڪريو. نه! ڇو ته اهو ۽ هاڻي وارا (منڍ کان وٺي) هڪ ٻئي سان ٻڌل آهن هنن جي ازلي دشمني عوام سان ئي آهي. جيڪڏهن عمران خان مهانگائيءَ جا بنياد وجهي چڪو تيل ٽي سو روپيا ڪرڻ جا معاهدا ڪري ويو آهي ته پوءِ  ان کي سزا ملڻ گهرجي. جيڪڏهن اوهان ان کي گرفتار ڪري سزا نه ٿا ڏيو ته پوءِ  هي منافقت وارا ڊراما ڇو؟

 

 

 

 

 

 

You might also like

Leave A Reply

Your email address will not be published.