وڳڻ لڳ ڪار رڪشا سان ٽڪرائجي وئي، ماءُ ڌيءُ سميت فوت

لاڙڪاڻو(ڊ ر) وڳڻ ڀرسان تيز رفتار ڪار جو ٽائر برسٽ ٿيڻ سبب ڪار ڪلٽي ٿي رڪشا سان ٽڪرائجي وئي، حادثي ۾ عورت ۽ سندس ستن ورهين جي ڌيءَ فوت ۽ ٻه ڄڻا زخمي ٿي پيا، هڪ ڄڻو معجزاڻي طور محفوظ رهيو، فوتين جا لاش گهر پهچڻ تي گهر ڀاتين ۾ روڄ راڙو پئجي ويو. ان سلسلي ۾ ڪالهه وڳڻ ڀرسان ٿرڙي هاشم روڊ تي ڪراچي کان شهدادڪوٽ ويندڙ تيز رفتار ڪار جو ٽائر برسٽ ٿيڻ سبب ڪار ڪلٽي ٿي رڪشا سان ٽڪرائجي وئي جنهن جي نتيجي ۾ شهدادڪوٽ شهر جي سيف الله ڪالوني واسڻ عورت اربيلي زال عاشق سولنگي ۽ سندس 7 ورهين جي ڌيءَ ڪائنات تڏي تي فوت ٿي ويون جڏهن ته حادثي ۾ فوتي عورت جو والد امداد علي سولنگي ۽ عبدالستار سولنگي سخت زخمي ٿي پيا ۽ فوتي عورت جو مڙس عاشق علي سولنگي معجزاڻي طور محفوظ رهيو، اطلاع تي آسپاس جي ماڻهن پهچي لاشن ۽ زخمين کي کڻائي چانڊڪا اسپتال جي حادثن واري شعبي ۾ آندو جتي زخمين کي فوري طور طبي امداد ڏئي ضروري ڪاروائي بعد ٻئي لاش وارثن حوالي ڪيا ويا. ان موقعي تي زخمي عاشق علي سولنگي ٻڌايو ته آءُ ڪراچي ۾ موٽرسائيڪلن جي شوروم تي ڪم ڪندو آهيان، آءُ پنهنجي گهر ڀاتين سان گڏجي پنهنجي دوست جعفر پنجابي جي ڪار ۾ ٻارن کي کڻائي شهدادڪوٽ پئي ويس ته وڳڻ ڀرسان ٿرڙي هاشم روڊ تي تيز رفتاري سبب ڪار ڪلٽي ٿي رڪشا سان ٽڪرائجي وئي جنهن جي نتيجي ۾ حادثو پيش آيو آهي. هوڏانهن فوتين جا لاش گهر منتقل ڪيا ويا جتي لاش گهر پهچڻ تي گهر ڀاتين ۾ روڄ راڙو پئجي ويو.

 

You might also like

Leave A Reply

Your email address will not be published.