منير ڊومڪي :ادب جي آڪاش جو ھڪ ستارو

تحرير؛انجنيئر اياز خليل چنجڻي

تخليقڪار ڪھڙو به ھجي ھن جو اول ڪم اھو ھجي ته ھو سماج ۾ پنھنجي فن پارن وسيلي پنھنجو ھاڪاري ڪردار ادا ڪري .پنھنجي ڪردار ۽  قلم وسيلي ھو سماج کي بھتر بڻائڻ جي لاءِ قلم کي ھٿيار طور استعمال ڪري، ڇو ته قلم جي طاقت تلوار جي طاقت کان وڌيڪ آھي.

پر جي ڪو قلمڪار يا ڏات ڌڻي استاد جي پيغمبري واري پيشي سان جُڙيل ھجي ته اھا ذميواري ھن تي ٻيڻي ٿي وڃي ٿي. ڇاڪاڻ ته سوين شاگردن جو مستقبل به ھن جي ھٿ ھوندو آھي. جيڪي ھڪ اعلي ۽ قابل استاد جي زير اثر رھي ھن مان پرائن ٿا ، پنھنجي مستقبل  جا دڳ ۽ رستا بڻاين ٿا

    مستقبل جي ان ئي راھن تي رھنمائي ڪندڙ  لاڙڪاڻي جي زرخيز مٽي سان تعلق رکندڙ ھڪ مثالي ڪردار پروفيسر منير ڊومڪي به ھڪ اھڙي مشعل راھ جلايون ويٺو آهي جنھن جي روشني مان ڪيترائي شاگرد توڙي سماج لاڀ پيو حاصل ڪري.

 پروفيسر منير ڊومڪي سان منھنجي اڻ ڏٺي شناسائي ڳچ وقت کان ھلندي پئي اچي. منھنجي ھن سان ڪا آمھون سامھون ملاقات ته ڪونھي پر مان ھن سان سندس لکڻين وسيلي ملندو رھندو آھيان.

جڏھن ته ھو لاڙڪاڻي جو ۽ آئون نصيرآباد ويجھو ڳوٺ ميانداد چنجڻي جو رھاڪو آھيان جيڪو پنڌ ته ايڏو پري ڪونھي ،

جڏھن جڏھن ھن جي ڪا تازي يا ڪا پراڻي تخليق نظرن مان گذرندي آھي ته ان تخليق وسيلي ڄڻ منھنجي ھن سان ملاقات ٿي ويندي آهي. ڇاڪاڻ ته تخليق ڪنھن به تخليقڪار جي اندر جي اٿاھ احساسن ۽ انھن جي اظھار جو عڪس ھوندو آھي

 5 جنوري 1984ع تي نامور پروفيسر منير ڊومڪي جو جنم ڏينھن  آھي .ھو گھڻ رخي شخصيت آھن، سندس شخصيت جا انيڪ حوالا آهن. ھوھڪ قابل استاد ، ليکڪ ، انگريزي ادب جو وڏو ڄاڻو ، شاعر ۽ Motivational speaker به آھي

 ھو سنڌ  ۽ خاص طور لاڙڪاڻي ۾ ھڪ بھترين ۽ متاثر ڪندڙ  Motivational speaker طور سڃاتو وڃي ٿو.

تازو ئي سنڌ ٽي وي ،ڌرتي ٽي وي ۽ آواز ٽي وي تي انٽرويو دوران ھن، ڪارائتيون، متاثر ڪندڙ ۽ وڻندڙ ڳالھيون ڪيون جيڪي ماڻھن ۾ گھڻيون پسند ڪيون ويون. پنھنجي جاندار لکڻين وسيلي  ھو نوجوانن جو پسنديدھ ليکڪ به آھي.

پروفيسر منير ڊومڪي جو  شاھ عبداللطيف ڀٽائي تي به ذڪر ۽ واکاڻ جوڳو ۽ تاريخي ڪم ٿيل آھي.

شاھ صاحب جي شاعريءَ تي سندس لکيل مضمون وڏا ڄاڻ  ڏيڻ وارا ۽ سانڍڻ جھڙا آھن. سندس پھريون ڪتاب ” زندگي فاني ۽ فن لافاني ” ادبي حلقن توڙي پڙھندڙن ۾ وڏي مقبوليت ماڻي ورتي آھي. جڏھن ته ان جو ٻيو ايڊيشن به جلد ئي شايع ٿيڻ وارو آھي

 پروفيسر منير ڊومڪي جو تازو شاھڪار  ادبي پورھيو انور ڪليم جي ناول ” واپسي “ جو انگريزي ۾ ڪيل ترجمو آھي. جيڪو ڪنھن به جديد ناول جو ٻن ڏھاڪن ۾ ڪنھن به ترجمي نگار طرفان سنڌ ۾  ڪيل شايد پھريون ترجمو آھي.

انور ڪليم جي ناول جو عالمي ٻولي ۾ ڪيل ترجمو جتي سندس لاءِ ھڪ اعزاز آھي، ته ٻئي طرف پروفيسر منير ڊومڪي کي به داد ڏجي ٿو جنھن انگريزي ۾ ان جو ترجمو ڪري پنھنجي صلاحيتن کي مڃرايو آھي.

مان جيڪڏھن ان کي ائين بيان ڪريان ته شايد وڌاءُ نه ھوندو ته ھڪ ٻولي مان ڪنھن ڪتاب کي ٻئي ٻولي ۾ ترجمو ڪرڻ ڪنھن به ترجمي نگار جي لاءِ ڪنھن نئين ڪتاب لکڻ کان ھرگز گھٽ ڪونھي، وري جيڪڏھن اھو ترجمو انگريزي ۾ ھجي ته ضرور ترجمي نگار داد ۽ محبتن جو مستحق آھي.

پروفيسر منير ڊومڪي ڪافي ورھين کان مسلسل سنڌي توڙي مشهور انگريزي اخبارن ۾ پنھنجا ڄاڻ وارا ۽ پڙھندڙن جي پسنديدھ  ادبي عنوانن تي  مضمون لکندو پيو اچي.  ادبي شخصيتن جي ڪتابن تي وڊيو ليڪچر ھجن يا سندس ڪا نواڻ تي ٻڌل ڪا تخليق ھجي يا سندس ڪيل ترجما ھجن ھو منفرد ڪم ڪرڻ کي اوليت ڏئي ٿو .

ادب جي اڄوڪي ماحول ۾ اھڙن جاکوڙي نوجوانن جي سخت ضرورت آھي. ھن ڏاھي ۽ قابل نوجوان جو ادبي دنيا ۾ سفر ڪاميابين سان جاري و ساري آھي.

وقت جي ضرورت آھي ته اسان ذاتي لاڳاپن کي اھميت ڏيڻ بجاءِ انھن ڪردارن جي دادرسي ۽ حوصله افزائي ڪريون جيڪي محنت ۽  ڏاھپ سان  حقيقي معنيٰ ۾ ادب جي خدمت ڪري رھيا آھن.

 

You might also like

Leave A Reply

Your email address will not be published.