پنهنجي شڪست کي غلط رنگ نه ڏيڻ گهرجي

تحيري: نذير سومرو

ڪي پي ڪي ۾ ٿيل مڪاني چونڊن ۾ آيل شڪست کي غلط رنگ ڏيندي ملڪ جي وزيراعظم صاحب فرمايو ته اسان غلط اميدوار بيهارڻ سبب شڪست کاڌي. آئنده حڪمت عمليءَ جي پاڻ نگراني ڪندس. متوقه طور اٽڪل ساڳيا جملا/لفظ وزيرن صاحبن به ڪم آندا.

غور سان ڏٺو وڃي ته چونڊون هارائڻ جو سبب غلط اميدوار نه پر وزيراعظم ۽ سندس ٽيم جون غلط حڪمت عمليون ئي بڻيون آهن هاڻي وري فريب سان ان شڪست کي ٻيو رنگ ڏيئي ماڻهن جي ذهنن کي ڦيرائڻ لاءِ اهڙا بيان ڏنا پيا وڃن. دنيائي تاريخ ٻڌائي ٿي ته حڪمرانن پاران اصل اها ئي جنگ عوام سان وڙهي ويندي رهي ٿي يعني پروپيگنڊا جي جنگ. هن جنگ ۾ نشانو ڪنهن جو جسم نه پر ذهن هجي ٿو ۽ پنهنجي زهر جهڙي ڳالهين کي/ عملن کي ڳڙ جهڙن لفظن جو روپ ڏيئي عوام آڏو پيش ڪيو وڃي ٿو جنهن کي سٻاجهڙو عام ماڻهو اڻ سمجهيءَ جو  سدائين شڪار ٿيندو رهي ٿو.

تاريخ رڙيون ڪندي اهو ئي ٻڌائي ته سڀ ئي حڪمران ائين ڪندا رهيا آهن سندن هن عمل ۾ سدائين نواڻ ايندي رهي ٿي ۽ پنهنجي عذاب جهڙي زندگيءَ جو وڏو پٿر گهليندڙ عوام سڀ ڪجهه وساري وري هنن جي ڳالهين ۾ اچي وڃي ٿو. اسان جي ملڪ جا حڪمران هن اصول تي پابنديءَ سان هلندڙ رهيا آهن پر هي حڪمران ٻين کان ٻه قدم اڳتي آهن جنهن کي وري هي ڪڏهن ڪڏهن يوٽرن جو نالو به ڏين ٿا. ڪا ڳالهه جيڪا هنن کي ڦٻي ڪونه ٿي ان تان ڦري ان کي يوٽرن جو نالو ڏيڻ هنن جو کٻي هٿ جو کيل آهي پر اها ڳالهه اصل ۾ هوندي پروپيگينڊائي جنگ جو حصو ئي آهي.

پنهنجي ڪرتوتن تان توجهه هٽائڻ خاطر هن ملڪ ۾ اهو ڌنڌو پراڻو آهي جنهن لاءِ ڪتاب ڀريل آهن. حڪمران سدائين اهڙي انداز ۾ ڳالهائيندا رهيا آهن جن مان ڪيترائي مطلب نڪرن ۽ پڪڙجڻ کان پوءِ ان تان آسانيءَ سان ڦرندا رهيا آهن ۽ هن عمل سان سندن ٻيو مقصد به پورو ٿيو پوي ته عوام جا ذهن اصل حقيقت کان مڙي وڃن.

وزيراعظم صاحب به ٽن سالن کان جاري پنهنجي برباد ڪندڙ پاليسين کي ان جو ذميوار قرار ڏيڻ بجاءِ اهو تاثر ڏيڻ چاهي ٿو ته سندس پارٽيءَ غلط اميدوار چونڊيا جيڪا ڳالهه حقيقت کان گهڻو پري آهي.

وزيراعظم صاحب کي کليل دل سان اعتراف ڪرڻ گهرجي ته سندس پاليسين جي ڪري کيس عوام ٺڪرايو. خاص طور تي جيڪو مهانگائيءَ جو اوڙاهه هن شخص جي حڪومت ۾ ٻاريو ويو آهي ان عوام جو ويساهه کسي ورتو آهي. عوام جو ويساهه هن حڪومت جي داخلا ۽ خارجا پاليسين سميت پراڻن (اقتدار کان ٻاهر هجڻ وقت ڪيل) وڏن واعدن تي عمل وري بلڪل ان جي برعڪس ڪرڻ به کڻائي ورتو هو پر جيئن ته مهانگائي عوام مٿان سڌو اثرانداز ٿئي ٿي تنهنڪري ووٽ ڏيڻ وقت عوام جي ذهن ۾ هن خلاف نفرت کين مجبور ڪيو ته اهي ٺپو هن جي نشان بجاءِ هن جي مخالف جي نشان تي هڻن.

ملڪي پرڏيهي پاليسي ته اڳ ئي ناڪام هئي جيڪڏهن ائين چئجي ته پنهنجي پاليسي هئي ئي ڪونه اها ٻئي دوست ملڪن جي پويان ڪڍ لڳندڙ پاليسي هئي ته بجا ٿيندو پر هن حڪومت جيڪو ڪردار رکيو آهي اهو ڪردار دنيا کان ملڪ کي ڪوهين ڏور ڪندڙ آهي. افغان پاليسي جنهن لاءِ وڏيون وڏيون دعوائون ٿينديون رهيون آهن ان جا پول به پڌرا ٿي رهيا آهن. خاص طور ٽي ٽي پي جيڪا افغان طالبان جو حصو آهي ۽ طالبان جي چوڻ کان ٻاهر ڪڏهن به ناهي ان پاران جنگ بندي معاهدي جي تجديد نه ڪرڻ گهڻا راز کوليندڙ آهي توڙي جو عمران حڪومت پنهنجي وت/قد بت کان وڌيڪ انهن لاءِ چندي ڏيڻ کان ڪانفرنسن ۾ افغان عوام لاءِ دنيا کي نرم گوشو رکڻ جي اپيل ڪندي رهي آهي.

آمريڪا کان سعودي عرب تائين، ايران کان ترڪيءَ تائين ادا ڪيل ڪردار به ملڪ کي وڌيڪ اڪيلو ڪندڙ آهي. ماضيءَ ۾ مٿي بيان ڪيل ملڪ ڊالرن جي برسات/امداد سان ”پل ڀريندڙ“ رهيا آهن ۽ اسان به انهن سان شاهه کان وڌيڪ شاه جو ڪردار ادا ڪندڙ رهيا آهيون. اسان يا قربان واري پاليسي اختيار ڪندي پوئتي مڙي ڪونه ڏٺو ته اهي ڊالر مفت ۾ ناهن ملندا جيڪا ڳالهه هاڻي سمجهه ۾ اچڻ شروع ٿي چڪي آهي.

داخلا پاليسيءَ جي حالت اها آهي جو قانون نالي ڪا شيءَ موجود ڪونهي. تحريڪ لبيڪ واري ڌرڻي ۽ ان جي بليڪ ميلنگ ۾ اچي ان سان معاهدا ڪرڻ ۽ هن حڪومت جي وزيرڙن پاران انهن جي حق ۾ بيان ڏيڻ به عوام کي تحريڪ انصاف جي نشان مٿان ٺپي هڻڻ کان روڪيندڙ عمل رهيو هوندو ڇو ته عام تاثر اهو هو ته ملڪ جا حڪمران ڌرڻن وارن کان بليڪ ميل ٿين پيا جيڪا حڪومتي رٽ جي ناڪامي آهي.

تنهنڪري وزيراعظم صاحب کي کلي دل سان پنهنجي داخلي ۽ خارجي پاليسين جي ناڪاميءَ جو اعتراف ڪندي هن شڪست کي قبولڻ گهرجي، عوام جي ذهنن کي ڌوڪو ڏيڻ بجاءِ صاف لفظ استعمال ڪرڻ گهرجن.

 

 

You might also like

Leave A Reply

Your email address will not be published.