خيبر پختونخواهه ۾ شڪست تحريڪ انصاف ۾ سونامي آڻي ڇڏي، سموريون تنظيمون تحليل

 

اسلام آباد (ويب ڊيسڪ) وزيراعظم عمران خان خيبر پختونخواهه جي مڪاني چونڊن ۾ شڪست تي تحريڪ انصاف جون سڀ تنظيمون ٽوڙي ڇڏيون.

وزيراعظم عمران خان جي صدارت هيٺ سپريم ڪميٽي جو اجلاس ٿيو، جنهن ۾ خيبر پختونخواهه ۽ پنجاب جي وڏن وزيرن، سنڌ، پنجاب ۽ خيبر پختونخواهه جي گورنرن، وفاقي وزيرن ۽ سينيئر اڳواڻن شرڪت ڪئي.

اجلاس ۾ ملڪي سياسي ۽ معاشي صورتحال جو جائزو ورتو ويو، جڏهن ته خيبر پختونخواهه ۽ پنجاب ۾ مڪاني چونڊن تي مشاورت ڪئي وئي.

اجلاس کانپوءِ پريس ڪانفرنس ۾ وفاقي وزير فواد چوڌري ٻڌايو ته وزيراعظم مرڪز کان وٺي تعلقن تائين سڀ ڪميٽيون ختم ڪري ڇڏيون آهن، ڪنهن مائٽ کي پارٽي ٽڪيٽ ڏيڻ جو فيصلو مقامي قيادت نه ڪندي، پارٽي جو نئون انتظامي ڍانچو جوڙيو ويندو.

هن دعويٰ ڪئي ته تحريڪ انصاف هن وقت به ڪي پي جي سڀ کان وڏي جماعت آهي، دانهون مليون آهن ته ڪي پي ۾ ٽڪيٽون خاندانن ۾ ورهايون ويون،  وزيراعظم ميرٽ جي ابتڙ ٽڪيٽن جي ورهاست تي ڪاوڙ جو اظهار ڪيو.

سندس چوڻ هو ته وزيراعظم تحريڪ انصاف جي سڀني تنظيمن کي ٽوڙڻ جو فيصلو ڪيو آهي، تحريڪ انصاف نئين آئيني ڪميٽي جوڙي ڇڏي آهي، جنهن ۾ سموري قيادت شامل هوندي، مڪينزم جوڙيو ويندو، جنهن تحت ٽڪيٽن جي ورهاست ٿيندي.

فواد چوڌري ٻڌايو ته تحريڪ انصاف جي سمورا پارلياماني بورڊ به ٽوڙيا ويا آهن، وزيراعظم کي ڪي پي چونڊن بابت اڃا تائين باضابطا رپورٽ پيش ناهي ڪئي وئي، 21 رڪني ڪميٽي سامهون سڀ معاملا ايندا، جيڪا پوءِ انهن کي جاچيندي.

وفاقي وزير موجب جيڪڏهن ڪنهن کي ليڊر مڃيو ويندو آهي ته اهو عمران خان آهي، تحريڪ انصاف کانسواءِ اهڙي ڪا پارٽي ناهي، جيڪا وڏي انگ ۾ ٽيڪٽون جاري ڪري، تحريڪ انصاف ملڪ جي سڀ کان وڏي پارٽي آهي، هيٺ ويندي ته پاڪستان جي سياست هيٺ ويندي.

You might also like

Leave A Reply

Your email address will not be published.