ڪراچي ۾سينيئر صحافيءَ جي ڪتاب جو مهورت

ڪراچي(رپورٽ: صادق سومرو) سينيئر صحافي اسلم خواجه جي ڪتاب ”ڪراچي اسٽوڊنٽس آن مارچ“ جي افتتاحي تقريب گذريل ڏينهن آرٽس ڪائونسل ڪراچي ۾ ٿي گزري جنهن ۾ سياسي ڪارڪن، صحافين ۽ ٻين شعبن سان تعلق رکندڙ ماڻهن جي وڏي انگ شرڪت ڪئي. ان تقريب جي ميزباني پروفيسر توصيف احمد ڪئي ۽ صدارت پروفيسر، ليکڪ ۽ 4 مارچ جي هيرو اعجاز قريشي ڪئي. مهمان خصوصي ۾ سينيئر صحافي سهيل سانگي، پروگريسو اسٽوڊنٽ ڪليڪٽو جي سيڪريٽري جنرل ورثا پيرزادو ۽ پروگريسو اسٽوڊنٽس فيڊريشن جي صدر وقاص عالم انگاريه ڪئي. تقريب کي خطاب ڪندي اسلم خواجه ٻڌايو ته ڪتاب هيمون ڪالاڻي کي ڊيڊيڪيٽ ڪيو ويو آهي جيڪو برصغير جي وڏي تنظيم آل انڊيا اسٽوڊنٽس فيڊريشن جو پهريون شهيد هيو. بحيثيت سنڌ جو شهري منهنجي لاءِ اها فخر جي ڳالهه آهي ته ڪتاب جو پريفيس حسو ڪيولراماڻي لکيو جنهن جي متعلق سوڀو گيانچنداڻي ۽ شيخ اياز چيو ته حشو اسان جو سياسي استاد هيو. پي ايس سي جي ميمبر ورثا پيرزادو چيو ته هي ڪتاب هر شاگرد کي پڙهڻ گهرجي هن ڪتاب ۾ جيڪو شاگردن بابت چارٽر شامل ڪيو ويو آهي ان ۾ تقريباَ سڀ مطالبا اڄ جو شاگرد ڪري رهيو آهي. اسان وٽ شاگرد مسلسل جدوجهد ۾ آهن. 1905 کاب 1946 تائين ڪيل جدوجهد اڄ جي جدوجهد سان مطابقت رکي ٿي. پي آر ايس ايف جي اڳواڻ وقاص انگاريه چيو ته اهڙا ڪتاب اسان لاءِ آئينو آهي. هي ڪتاب جنهن وقت لکيو ويو اهو ڪولونيل دور هيو، ان وقت جيڪي شاگردن جا مطالبا هيا ۽ جيئن انهن مطالبا مڃرايا اها اسان جي گلوريفائيڊ ماضي آهي. ان وقت جيڪا اها تحريڪ هئي اها بلڪل اهڙي طرح آهي جيڪا اسان هن وقت ڪري رهيا آهيون. سينيئر صحافي ۽ تجزيه نگار سهيل سانگي چيو ته هن ڪتاب مان ڪجهه صفحا مسنگ هجڻ بعد به هي ڪتاب پنهنجي طور تي مڪمل آهي اها تمام دلچسپ شيءِ آهي. هي ڪتاب جنهن دور ۾ لکيو ويو آهي هن دور ۾ وڏيون وڏيون تحريڪون هلي رهيون هيون. مان نوجوان شاگردن کي اهو مشورو ڏيندم ته ڪنهن هڪ نڪتي تي سڀ شاگرد ملي تحريڪ هلايو. پروفيسر اعجاز قريشي چيو ته هن ڪتاب جو مهاڳ لکندڙ عظيم شخصيت حشو ڪيولراماڻي کي جبري سنڌ مان ڪڍيو ويو. هو ڪراچي ۾ رهڻ پيو چاهي پر کيس نه رهڻ ڏنو ويو. هن ڪتاب ۾ شاگردن جي جدوجهد لکيل آهي ته سنڌ ۾ خاص ڪري ڪراچي ۾ شاگرد باشعور هيا ۽ پنهنجي مطالب جي مڃتا لاءِ تحريڪ هلائي. انهن سنڌ جي مختلف شهرن ۾ سيمينارز ڪرايا. مان اسلم خواجه ۽ سهيل سانگي کي درخواست ڪندم ته هن ڪتاب جو ترجمو سنڌي ۽ اردو ۾ ڪرايو وڃي ته جيئن اهي شاگرد به سمجهي سگهن جيڪي انگريزي نٿا سمجهن. تقريب ۾ ڪتاب ۾ لکيل نظم ڊائو يونيورسٽي ۾ ايم بي بي ايس ڪندڙ شاگردياڻي ايلسا قاضي پڙهيو ۽ اردو يونيورسٽي جي ليڪچرار ڪتاب مان شاگردن جا لکيل مطالبا پڙهيا.

 

You might also like

Leave A Reply

Your email address will not be published.