راڻا ثناءُ الله طرفان اسٽيبلشمينٽ جي آڇ رد ڪرڻ جي دعويٰ

 

لاهور(ويب ڊيسڪ) مسلم ليگ ن جي اڳواڻ راڻا ثناءُ الله دعويٰ ڪئي آهي ته اسٽيبلشمينٽ جي ڪجهه وقت اڳ راءِ هئي ته توهان اِن هائوس تبديلي آڻيو ۽ لانگ مارچ ڏانهن نه وڃو، پر پي ڊي ايم قيادت ان کي قبول نه ڪيو هو.

نجي ٽي وي جي هڪ پروگرام ۾ ڳالهائيندي راڻا ثناءُ الله چيو ته جنهن وقت پي ڊي ايم ۾ لانگ مارچ ۽ استعيفائن جي ڳالهه هلي رهي هئي ان وقت اسٽيبلشمينٽ جو اهو موقف هو.

پيپلزپارٽي چيئرمين بلاول ڀُٽو زرداري جي ن ليگ تي تنقيد جي جواب ۾ راڻا ثناء چيو ته بلاول جيترو وڻيس لڪائي پر سچ ڪڏهن ناهي لڪندو، ٻين کي سهولتڪاري جا طعنا ڏيڻ سان پنهنجي سهولتڪاري لڪي نه سگهندي.

هن چيو ته اسان نه پيپلزپارٽي تي الزام هڻڻ چاهيون ٿا ۽ نه ئي پيپلزپارٽي اسان جو فوڪس آهي، پر جيڪڏهن پيپلزپارٽي ۽ بلاول حڪومت جي خلاف عدم اعتماد جي تحريڪ آڻڻ چاهين ٿا ته اها جلسن ۾ نٿي آڻي سگهجي، قومي اسيمبلي ۽ پنجاب اسيمبلي ۾ عدم اعتماد واري تحريڪ آڻين، ن ليگ سپورٽ ڪندي ۽ اسان جو هڪ ووٽ به ان ۾ گهٽ نه هوندو.

سندس چوڻ هو ته پنجاب اسيمبلي ۾ پيپلزپارٽي کي گڏائي اسان وٽ تقريبن 160 ووٽ آهن، بزدار حڪومت ڪيرائڻ لاءِ گهٽ ۾ گهٽ 20 يا 25 وڌيڪ ووٽ گهربل آهن، ترين گروپ جا ماڻهو ڪڏهن ته عدم اعتماد واري تحريڪ ۾ ساٿ ڏيڻ لاءِ تيار نه ٿيا، جيڪڏهن هجن ها ته ضرور انتي اڳڀرائي ڪيون ها، ترين گروپ ۽ چوڌري برادران اسان سان ڳالهيون ڪري پنهنجو وزن وڌايو پر هو عدم اعتماد جي لاءِ ڪڏهن به تيار نه هئا.

You might also like

Leave A Reply

Your email address will not be published.