ڪراچي ۾ حددخلين جي متاثرن کي پلاٽ ڏيڻ جو فيصلو

ڪراچي (رپورٽر): سنڌ جي وڏي وزير سيد مراد علي شاهه پراونشنل ڪوآرڊينيشن اينڊ امپليمينٽيشن ڪميٽي (پي سي آءِ سي) اجلاس جي صدارت ڪندي ضلع سينٽرل جي 7000 روڊ تي حددخليون هٽائڻ واري  مهم سبب متاثر ٿيندڙ شهرين کي 47 پلاٽ الاٽ ڪرڻ جو فيصلو ڪيو ۽ ٽرانسپورٽ کاتي کي هدايت ڪئي ته آگسٽ کان بي آرٽي اورينج لائين مڪمل ڪئي وڃي ۽ ڪراچي سرڪلر ريلوي تي ڪم جي رفتار کي تيز ڪيو وڃي. اجلاس جمعي ڏينهن وزيراعليٰ هائوس ۾ ٿيو جنهن ۾ صوبائي وزيرن ۾ ناصر شاهه، اويس قادر شاهه، قانوني صلاحڪار مرتضيٰ وهاب، ڪور ڪمانڊر ڪراچي ليفٽيننٽ جنرل نديم انجم، چيف سيڪريٽري ممتاز شاهه، جي او سي ملير ميجر جنرل عمر مقبول، چيئر پرسن پي اينڊ ڊي شيرين ناريجو،  چيئرمين اين ڊي ايم اي ليفٽيننٽ جنرل اختر نواز وڊيو لنڪ ذريعي اجلاس ۾ شرڪت ڪئي. اجلاس جي ايجنڊا ۾ ڪي سي آر ۽ بي آر ٽي منصوبن، اينٽي انڪروچمينٽ مهم، نالن جي بحالي تي اڳڀرائي، ڊيزاسٽر مئنيجمينٽ پلان شامل هئا. ڪي سي آر بابت   ٽرانسپورٽ کاتي اجلاس کي ٻڌايو ته ايف ڊبليو او، ڪي سي آر روٽ تي فلائي اوور / انڊر پاسز لاءِ تفصيلي ڊزائين جي لاءِ سروي ڪرائي هئي. پي سي -1 مطابق 4.9 ارب رپين جي لاڳت سان ٽي ايليويٽڊ اسٽرڪچر تعمير ڪيون وينديون. 11.508 ارب رپين جي لاڳت سان 6.4 ڪلوميٽر ايراضي تي مرحلن ۾ وڏيون عمارتون تعمير ڪيون وينديون. سنڌ جي وڏي وزير چيو ته هن 6 ارب رپيا ڏيڻ جو واعدو ڪيو هو جيڪي سندس حڪومت ريلوي اختيارين جي ٽائم لائين مطابق فراهم ڪندي. پي ڊي ڪي سي آر عامر دائودپوٽا اجلاس کي ٻڌايو ته ڪم شروع ڪرڻ کان اڳ ڪجهه مسئلا حل ڪرڻ جي ضرورت آهي. ان تي وڏي وزير چيو ته سومر تي ڪي آر سي، ٽرانسپورٽ کاتي ۽ سٽي ايڊمنسٽريشن تي ٻڌل اجلاس جي صدارت ڪندو ته جيئن ڪي سي آر جا سمورا معاملا حل ٿي سگهن جهڙوڪه سپريم ڪورٽ جي حڪم موجب ڄاڻايل منصوبي تي ڪم شروع ڪري سگهجي.  اجلاس ۾ ٻڌايو ويو ته سنڌ حڪومت اورينج لائن منصوبي جيڪو 3.88 ڪلوميٽر ايراضي تي ٻڌل آهي جنهن ۾ چار اسٽيشن ۽ هڪ بس ٽرمينل شامل آهن، منصوبي جو انفراسٽرڪچر ايندڙ مهيني جي آخر تائين مڪمل ڪيو ويندو. ٽرانسپورٽ کاتي بي آر ٽي کي هلائڻ لاءِ 20 بسن جي خريداري ۽ ايس آءِ ڊي سي ايل کي 2 ارب 21 ڪروڙ رپيا ۽ بي آر ٽي کي آپريشنل ڪرڻ جي سلسلي ۾ 587194113 رپيا جاري ڪيا آهن، اهي بسون ڊسمبر 2021 ۾ چائنا کان اينديون. اجلاس کي ٻڌايو ويو ته ملير هالٽ ۽ موسميات ڊپو جيڪي پاڪستان رينجرز جي استعمال هيٺ آهن انهن خاطري ڪرائي آهي ته جڏهن ڪم شروع ٿيندو ته اهي خالي ڪري ڇڏيندا. وڏي وزير چيف سيڪريٽري کي هدايت ڪئي ته رينجرز کي متبادل جڳهه فراهم ڪئي وڃي ته جيئن هو آساني سان پنهنجو ڪم جاري رکي سگهي. ييلو لائين 61.436 ارب رپين جو هڪ ٻيو صوبائي حڪومت جو منصوبو آهي جنهن ۾ ورلڊ بينڪ جو حصو 53.540 ارب رپيا آهي، سنڌ حڪومت 2.654 ارب روپيا ۽ پرائيويٽ سيڪٽر کي 5.250 ارب رپيا قرض ڏيڻ جو منصوبو آهي. اهو بنيادي طور تي ڪورنگي ۽ صنعتي علائقن جي رستن سان ٺهندا جيڪي شهر جي ڏکڻ اوڀر وارين علائقن، ڏکڻ ۽ سينٽرل ضلعن کي پاڻ سان ملائيندا. اهو 21 ڪلوميٽر تي ٻڌل پراجيڪٽ آهي جيڪو دائود چورنگي کان نمائش تائين هوندو. هتي 2 فلائي اوور، 9 انڊر پاس، هڪ يو ٽرن ۽ 28 اسٽيشنون هونديون. رستي جي ٻنهي پاسن کان 42 ڪلوميٽر تي ٻڌل موٽر سائيڪل لاءِ ٽريڪ هوندو. اهو روزانو 300000 مسافرن لاءِ سهولت بڻجندو. ھن رستي تي 268 ڊيزل ھائبرڊ بسون ھلنديون. اجلاس کي ٻڌايو ويو ته عيد کانپوءِ عالمي بينڪ جي صلاح سان هڪ حتمي معاهدو ڪيو ويندو. اجلاس کي ٻڌايو ويو ته نمائش تائين ان جو بنيادي ڍانچو 30 آگسٽ تائين مڪمل ٿي ويندو ۽ 10 آگسٽ تي چين کان بسون هتي پهچنديون. وڏي وزير کي يقين ڏياريو ويو ته منصوبو 10 آڪٽوبر 2021 کان شروع ٿيندو.ڪمشنر ڪراچي نالن جي ڪَپن سان گڏ حددخلي ٽوڙ مهم بابت اجلاس کي ڄاڻ ڏيندي ٻڌايو ته نالن جي ڪنارن سان گڏ قائم 5134 يونٽن کي ختم ڪيو ويو آهي جنهن ۾ محمود آباد نالي سان گڏ 238 يونٽ، گجر نالي وٽ 3290 يونٽ، 416 اورنگي نالي (سينٽرل)، 1001 يونٽ اورنگي (اولهه) ۽ 189 يونٽ اورنگي نالو (ضلع ڪيماڙي) شامل آهن.03

 

You might also like

Leave A Reply

Your email address will not be published.