ملڪ ۾ ڪورونا وائرس جا هڪ هزار 788 نوان مريض، فوتگيون ساڍا 5 هزار کان وڌي ويون

اسلام آباد(ويب ڊيسڪ) پاڪستان ۾ ڪورونا وائرس جي صورتحال ۾ ڪجهه حد تائين بهتري ڏٺي وئي آهي ۽ روزاني رپورٽ ٿيندڙ ڪيسن جي انگ ۾ گهٽتائي ٿي آهي.

ملڪ ۾ ڪورونا وائرس مان متاثر ٿيلن جو گڏيل انگ 2 لک 61 هزار 189 تائين پهچي چڪو آهي جڏهن ته 5 هزار 508 ڄڻا فوت ٿي چڪا آهن.

سرڪاري انگن اکرن موجب ملڪ ۾ 17 جولاءِ جمعي تي هڪ هزار 788 نوان ڪيس ۽ 43 فوتگيون رپورٽ ٿيون جڏهن ته 5 هزار مريض صحتياب ٿيا.

سنڌ:

سنڌ ۾ ڪورونا وائرس جي روزاني ڪيسن ۾ گهٽتائي ڏسڻ ۾ نه پئي اچي ۽ اڄ به وڌيڪ هڪ هزار 170 ماڻهن ۾ ان وائرس جي سڃاڻپ ٿي آهي.

سنڌ جي وڏي وزير موجب گذريل 24 ڪلاڪن دوران وائرس سبب وڌيڪ 30 مريض لاڏاڻو ڪري ويا جڏهن ته 14 هزار مريض صحتياب ٿيڻ ۾ ڪامياب ٿيا.

نون ڪيسن کان پوءِ سنڌ صوبي ۾ ڪورونا متاثرنجو گڏيل انگ 1 لک 11 هزار 238 ۽ فوتگيون 1 هزار 952 تائين پهچي ويون آهن.

پنجاب:

پنجاب صوبي ۾ ڪورونا وائرس جا وڌيڪ 484 نوان ڪيس سامهون آيا ۽ 8 فوتگين جي واڌ ٿي.

ملڪ ۾ ڪورونا وائرس جي صورتحال جي نگراني لاءِ قائم سرڪاري پورٽل موجب صوبي ۾ گذريل 24 ڪلاڪن ۾ گڏيل ڪيس 484 جي واڌ کان پوءِ 89 هزار 23 ٿي ويا.

ٻئي پاسي صوبي ۾ وڌيڪ 8 مريض فوت ٿي ويا ۽ ائين فوت ٿيلن جو انگ 2 هزار 59 ٿي ويو.

اسلام آباد:

وفاقي راڄڌاني اسلام آباد ۾ ڪورونا وائرس وڌيڪ 52 ڄڻن کي متاثر ڪيو جڏهن ته هڪ مريض لاڏاڻو ڪري ويو.

حڪومتي انگن اکرن موجب شهر ۾ گذريل 24 ڪلاڪن دوران وڌيڪ 52 ڄڻن ۾ ان وائرس جي سڃاڻپ سان گڏيل ڪيس 14 هزار 454 ٿي ويا.

ان کان سواءِ هڪ ٻئي فرد جي لاڏاڻي سان اُتي گڏيل فوتگيون 157 ٿي ويون آهن.

بلوچستان:

بلوچستان جي صحت کاتي ڪورونا جي 20 نون ڪيسن جي تصديق ڪئي جنهن کان پوءِ متاثر ماڻهن جو انگ 11 هزار 405 ٿي ويو.

صوبي ۾ وڌيڪ 3 ڄڻا وائرس جو شڪار ٿي فوت ٿي ويا جنهن کان اُهتي فوتين جو انگ 131 ٿي ويو.

گلگت بلتستان:

گلگت بلتستان ۾ ڪورونا وائرس جي صورتحال تي چڱي حد تائين ڪنٽرول ڏٺو ويو پر گذريل 24 ڪلاڪن ۾ 25 نوان مريض سامهون آيا ۽ هڪ فوتگي رپورٽ ٿي.

سرڪاري انگن اکرن موجب انهن 25 نون ڪيسن کان پوءِ گڏيل طور تي ڪيسن جو انگ 1 هزار 750 تائين پهچي ويو جڏهن ته هڪ ٻئي مريض جي فوت ٿيڻ سان فوتين جو انگ 39 ٿي ويو.

آزاد ڪشمير:

آزاد ڪشمير ۾ ڪجهه ڏينهن دوران ڪورونا وائرس جي ڪيسن ۾ واڌ ڏٺي وئي ۽ هاڻ هتي متاثرن جو انگ گلگت بلتستان کان به وڌي چڪو آهي.

سرڪاري انگن اکرن موجب آزاد ڪشمير ۾ گذريل 24 ڪلاڪن ۾ 37 ڄڻا متاثر ٿيا ۽ ائين  گڏيل ڪيس 1 هزار 808 تائين پهچي ويا.

You might also like

Leave A Reply

Your email address will not be published.